اسلام آباد :اوور سیز پاکستانیوں کے لئے خصوصی اسکیم "پاکستان بناؤ سرٹیفکیٹس” کا آج اجراء کیا جائے گا، وزیراعظم عمران خان افتتاحی تقریب سے خطاب کریں گے۔
تفصیلات کے مطابق سمندر پار پاکستانیوں کے لئے خصوصی اسکیم "پاکستان بناؤ سرٹیفیکٹ” کے اجراء کی افتتاحی تقریب آج ہوگی، تقریب کی ٹیگ لائن”منافع آپ کا مستقبل پاکستان کا” ہے، وزیراعظم عمران خان تقریب سے خطاب کریں گے۔
سرٹیفکیٹس کے ذریعے بیرون ملک مقیم پاکستانی ملکی معیشت میں بہتری کیلئے سرمایہ کاری کر سکیں گے۔
وزارت خزانہ کےمطابق بانڈز کی مدت تین سال اورپانچ سال ہوگی، تین سالہ بانڈزپرشرح منافع چھ اعشاریہ دوپانچ فیصدجبکہ پانچ سالہ بانڈز پر شرح منافع چھ اعشاریہ سات پانچ فیصد ہوگی۔
بانڈزبیک وقت پوری دنیا میں موجود پاکستانیوں کیلئے جاری کئے جائیں گے ، پاکستان پہلی بار سمندر پار پاکستانیوں کیلئے ایسی اسکیم لارہاہے۔
وزارت خزانہ کے مطابق یہ اوپن اینڈٹرانزیکشن ہوگی اورحجم کا تعین سرمایہ کاروں کےرسپانس کےمطابق طےکیاجائےگا جبکہ یہ سرٹیفیکیٹس بیرون ملک مقیم پاکستانیوں کو ان کے نائی کوپ پر دیئے جائیں گے۔
خیال رہے نومبر 2018 میں وزیراعظم پاکستان عمران خان نے بیرون ملک مقیم پاکستانیوں کے لئے نائیکوپ کی شرط ختم کردی تھی، اب بیرون ملک مقیم پاکستانیوں کو نائیکوپ کارڈ کی ضرورت نہیں ہوگی، دہری شہریت کے حامل پاکستانی پاسپورٹ دکھا کر وطن آسکیں گے۔
مزید پڑھیں : سمندر پار پاکستانیوں کے لیے ’نیا پاکستان کالنگ ویب پورٹل‘ کا افتتاح
اس سے قبل حکومت نے اوورسیزپاکستانیوں کی خدمات حاصل کرنے کا فیصلہ کرتے ہوئے “نیا پاکستان کالنگ ویب پورٹل” کا افتتاح کیا گیا تھا ، پورٹل میں بیرون ملک ڈاکٹرز، انجینئرز، پروفیسرز و دیگر ماہرین کا ڈیٹا جمع کیا جائے گا اور ضرورت کے تحت بیرون ملک ماہر پاکستانیوں سے رابطہ کیا جاسکے گا۔
واضح رہے اکتوبر میں وزیراعظم عمران خان کا کہنا تھا کہ کہ بیرون ملک مقیم پاکستانیوں کیلئےاسپیشل پیکج کااعلان کرنے والے ہیں،ہر طرح کی رکاوٹ ختم کریں گے تاکہ ترسیلات زرمیں اضافہ ہو اور اوورسیز پاکستانیوں کو ملک پہنچنے پرامیگریشن دشواری ختم کریں گے، مشن ہے اوورسیز پاکستانیوں کی دیکھ بھال بہتراندازمیں کریں گے۔
بعد ازاں اسلام آباد میں وزارت اوورسیز کے حکام کے اجلاس میں وزیراعظم عمران خان نے اوورسیز پاکستانیوں سے متعلق اہم فیصلے کرتے ہوئے بیرون ملک مقیم پاکستانی محنت کشوں کو سہولتیں دینے کا اعلان کیا تھا۔
