اسلام آباد: حکومت نے بانی پی ٹی آئی،عارف علوی اور قاسم سوری پر آرٹیکل 6 لگانے کا فیصلہ کرلیا اور کہا آرٹیکل 6 کا ریفرنس کابینہ سے منظوری کے بعد سپریم کورٹ پیش ہوگا۔
تفصیلات کے مطابق وفاقی وزیر اطلاعات عطا تارڑ نے پریس کانفرنس کرتے ہوئے کہا کہ عارف علوی ،قاسم سوری اور بانی پی ٹی آئی پر آرٹیکل 6کاریفرنس دائرکیا جائے گا، آرٹیکل 6 کا ریفرنس کابینہ سےمنظوری کے بعد سپریم کورٹ پیش ہوگا۔
عطا تارڑ کا کہنا تھا کہ اسمبلی توڑناآئینی خلاف ورزی ہے سپریم کورٹ کا حکم موجود ہے اس پر آرٹیکل 6 لگتا ہے، ہمارا کام مکمل تیاری کیساتھ ریفرنس دائرکرنا ہے کوئی کمی نہیں ہوگی، حکومت نے کسی کے خلاف غیرقانونی مقدمہ درج نہیں کیا۔
وزیراطلاعات نے کہا کہ مخصوص لابیاں پاکستان کیخلاف ساشوں میں مصروف ہیں، حکومت نے ان لابیوں کیخلاف سخت تادیبی کارروائی کرنے کا فیصلہ کیا ہے، قانون کے مطابق پاسپورٹ ، شناختی کارڈ بھی بلاک کرنا پڑا تو کریں گے، امریکی قرارداد کے پیچھے بھی یہی لابیاں تھیں۔
انھوں نے بتایا کہ اب چیئرمین نیب کوٹارگٹ کر رہے ہیں مہم چلائی جارہی ہے،اب دباؤ ڈالا جارہا ہے کہ نیب توشہ خانہ کیسز سے پیچھے ہٹ جائے۔
وفاقی وزیر کا کہنا تھا کہ یہ کہتے ہیں خان نہیں تو پاکستان نہیں، ہم نے بھی فیصلہ کیا ہے بانی پی ٹی اور پاکستان اکٹھے نہیں چل سکتے، آئین اور قانون کے دائرے میں رہتے ہوئے کارروائی کی جائےگی، کارروائی ہوگی تاکہ آئندہ کوئی سیاسی شخص آئین توڑنے اور فوج پرحملہ کرنے کا نہ سوچے۔
بانی پی ٹی آئی کے بیان کے حوالے سے انھوں نے کہا کہ آپ نے نہیں کہا ہو کہ سائفر سے کھیلنا ہے تو ہم اپنا کیس واپس لے لیتے ہیں، آپ کے ایڈوائزر بتاتے تھے خان صاحب یہ نعرہ لگادیں مشہور ہوجائے گا، ہم کوئی غلام ہیں کا نعرہ لگوایا تو پھر امریکا میں قرارداد موو کیوں کرائی۔
ان کا مزید کہنا تھا کہ آپ کے پاس بیرون ملک لابیوں کیلئے اتنا پیسہ آتاکہاں سے ہے، کسی سیاسی جماعت نے اپنی مدت میں اتنے جرم نہیں کئے جتنے آپ نے پونے 4سال میں کیے، آئین اور قانون کے مطابق تمام کارروائیاں عمل میں لائی جائیں گی۔
