کراچی : چیئرمین پیپلز پارٹی بلاول بھٹو زرداری رواں ماہ 27 ارب روپے کی لاگت سے تیار ہونے والے 39 کلومیٹر پر محیط ملیر ایکسپریس کا سنگ بنیاد رکھیں گے۔
تفصیلات کے مطابق سندھ حکومت کی جانب سے شہر قائد کی عوام کو بڑے تحفے سے نواز دیا گیا، وزیر اعلیٰ سندھ نے کہا ہے کہ ملیر ایکسپریس وے 39.4 کلومیٹر طویل ہوگا جو ملیر ندی کی بائیں کنارے پر تعمیر کیا جائے گا۔
وزیراعلیٰ سندھ نے منصوبے کی تعمیرات کا جائزہ اور حکام سے بریفنگ لینے کے بعد کہا کہ بلاول بھٹو رواں ماہ ملیر ایکسپریس وے کا سنگ بنیاد رکھیں گے۔
انہوں نے بتایا کہ ملیر ایکسپریس وے ہائی اسپیڈ ٹول ایکسپریس وے ہوگا، جس پر چھ لین تعمیر کی جائیں گی اور یہ تین فٹ ڈوئل کیرج وے ہوگا۔
مراد علی شاہ نے بتایا کہ ملیر ایکسپریس وے کی اسپیڈ ڈیزائن 100 کلومیٹر فی گھنٹہ ہوگی، جبکہ انٹر چینج پر اسپیڈ 50 کلومیٹر فی گھنٹہ ہوگی۔
وزیر اعلیٰ سندھ نے کہا کہ ملیر ایکسپریس وے کا آغاز کورنگی روڈ ڈی ایچ اے کریک ایونیو سے ہوگا اور یہ جام صادق پل، شاہ فیصل کالونی روڈ اور فیوچر کالونی سے کاٹھور جائے گا۔
مراد علی شاہ کا کہنا تھا کہ مذکورہ ایکسپریس وے کی تعمیر کے بعد ڈی ایچ اے فیز 8 سے فیز 9 تک کا سفر محض 20 منٹ میں طے ہوجائے گا۔
ان کا کہنا تھا کہ 27 ارب روپے کی لاگت سے بننے والے ملیر ایکسپریس وے پر پیدل چلنے والوں کیلئے 9 کراسنگ مقامات ہوں گے۔
وزیر اعلیٰ سندھ مراد علی شاہ کا کہنا تھا کہ سندھ حکومت یہ منصوبہ پبلک پرائیوٹ پارٹنر شپ سے شروع کررہی ہے، ملیر ایکسپریس وے شہر کراچی کے ٹریفک مسائل کو حل کرنے میں اہم کردار ادا کرے گا۔
