ریاض: سعودی عرب کا ورک ویزا اور رہائشی پرمٹ رکھنے والے غیرملکی سفری اجازت کے حامل ممالک سے براہ راست مملکت آسکتے ہیں۔
تفصیلات کے مطابق سعودی حکومت نے سفری اجازت کے حامل ممالک کے مسافروں کے لیے نیا ہدایت نامہ جاری کردیا ہے جس کے تحت ورک ویزا اور رہائشی پرمٹ رکھنے والے مسافر براہ راست سعودی عرب جاسکیں گے۔
سعودی ایوی ایشن(گاکا) کا کہنا ہے کہ ایئرلائنز مسافروں کی منظور شدہ ادارہ قرنطینہ سہولیات میں سے کسی ایک پر تصدیق شدہ بکنگ کا ثبوت یقینی بنائیں۔
گاکا نے سعودی ورک ویزا اور رہائشی پرمٹ ہولڈر مسافروں کو ہدایت کی ہے کہ جہاز پر سوار ہونے اور بورڈنگ کارڈ سے قبل کیو آر کارڈ دکھائیں، تمام ایئرلائنز کے لیے آرائیول پلیٹ فارم پر مسافروں کی رجسٹریشن کی تصدیق ضروری ہے، ایسے مسافروں کو ادارہ جاتی قرنطینہ سے مستثنیٰ قرار دیا جائے گا۔
ایوی ایشن نے خبردار کیا ہے کہ اصولوں کی خلاف ورزی پر قانونی کارروائی کی جائے گی۔
سعودی سول ایوی ایشن نے ایئرلائینز کو مراسلہ جاری کر دیا۔ خیال رہے کہ پاکستان پابندی والے ممالک کی فہرست میں شامل ہے، یہاں سے سعودی اقامہ ہولڈرز مملکت جانا چاہتے ہیں تو انہیں اجازت یافتہ ممالک میں 14 دن قیام کرنا ہوگا۔
