اسلام آباد: صدر نے یومِ آزادی کے موقع پر قیدیوں کی سزاؤں میں 180 روز کمی کی منظوری دیدی، سزاؤں میں کمی کا اطلاق عمر قید کے مجرموں پر ہو گا۔

اے آر وائی نیوز کے مطابق صدر پاکستان عارف علوی کی جانب سے یومِ آزادی کے موقع پر قیدیوں کی سزاؤں میں تخفیف کرتے ہوئے 180 روز کمی کی منظوری دیدی گئی ہے، سزاؤں میں کمی کا اطلاق عمر قید کے مجرموں پر ہو گا۔

65 سال سے زائد عمر کے ایک تہائی قید کاٹنے والے مرد قیدیوں پر اس منظوری کا اطلاق ہوگا،60 سال سے زائد عمر کی خواتین قیدیوں پر بھی سزا میں کمی کا اطلاق ہوگا۔

ایسے افراد جو کہ 18 سال سے کم عمرہیں ان کی سزا میں بھی کمی کا اطلاق ہوگا جب کہ قتل، جاسوسی اور ریاست مخالف سرگرمیوں میں ملوث قیدیوں پر اس کا اطلاق نہیں ہوگا۔

زنا، چوری، ڈکیتی، اغوا اور دہشت گردی میں سزا یافتہ مجرموں پر بھی منظوری قابلِ اطلاق نہیں ہوگی، مالی جرائم، قومی خزانے کو نقصان پہنچانے والوں کی سزاؤں میں بھی کمی نہیں ہوگی۔

یوم آزادی کے موقع پر صدر مملکت نے آئین کے آرٹیکل 45 کے تحت سزاؤں میں کمی کی منظوری دی ہے۔