کراچی: صدر مملکت ڈاکٹر عارف علوی نے کہا ہے کہ سرسبز ماحول انسان کی فطرت میں شامل ہے، نظام قدرت میں ہر ایک چیز کی اپنی اہمیت اور حیثیت ہے۔
ان خیالات کا اظہار صدر مملکت نے کراچی میں تعمیر قوم کے تحت سرسبز تحریک سے خطاب کرتے ہوئے کیا، انھوں نے کہا کہ ملک کو سرسبز و شاداب بنانے میں بلین ٹری سونامی منصوبہ اہمیت رکھتا ہے۔
صدر مملکت نے کہا کہ ملک میں جنگلات کی سطح تشویش ناک حد تک کم ہو رہی ہے، ایسے میں وزیر اعظم عمران خان کا ٹری منصوبہ سنگ میل کی حیثیت اختیار کر گیا۔
ان کا کہنا تھا خوش قسمتی کی بات یہ ہے کہ ملک کو صاف اور سرسبز بنانے اور گلوبل وارمنگ کے اثرات سے نمٹنے کے لیے موجودہ قیادت پر خلوص ہے۔
صدر عارف علوی کا کہنا تھا کہ ہمارے مذہب میں ماحول کی پاکیزگی پر بہت زور دیا گیا ہے، اسلام ہمیں روحانی اور جسمانی پاکیزگی کی تعلیم دیتا ہے۔
انھوں نے تقریب سے خطاب میں کہا کہ ملک میں سستی بجلی پیدا کرنے کے لیے توانائی کے متبادل ذرایع بروئے کار لانے کی ضرورت ہے۔
صدر مملکت کا کہنا تھا کہ جوہری اور آبی ذرایع توانائی کے سستے ترین ذرایع ہیں جب کہ بجلی کی پیداوار کے لیے پَون اور شمسی ذرایع کو بھی بھرپور انداز میں بروئے کار لانے کی ضرورت ہے۔
عارف علوی نے مزید کہا کہ قومی اسمبلی کو تقریباً پانچ سال پہلے شمسی توانائی پر منتقل کیا گیا تھا اور اب وہ ایوان صدر کو شمسی توانائی پر منتقل کرنا چاہتے ہیں۔
صدر عارف علوی نے توانائی کے متبادل ذرایع میں سرمایہ کاری کا خیر مقدم بھی کیا۔
