پاکستان کرکٹ ٹیم کے سابق فاسٹ بولر محمد عامر کا کہنا ہے کہ سلیکٹرز اپنی سلیکشن کا دائرہ صرف پاکستان سوپر لیگ تک نہ محدود کریں۔
پی ایس ایل فرنچائز کوئٹہ گلیڈی ایٹر کے لیے کھیلنے والے لیفٹ آرم پیسر کا کہنا تھا کہ بین الاقوامی کرکٹ میں واپسی کے حوالے سے کچھ نہیں سوچا، واپسی کا گرین سگنل مل رہا ہے یا نہیں اللّٰہ بہتر جانتا ہے۔ دماغ میں اس وقت انٹرنیشنل کرکٹ کی بات نہیں ہے۔
محمد عامر کا مزید کہنا تھا مختلف لیگز کھیل کر لطف اندوز ہورہا ہوں، ابھی تو انٹرنیشنل کرکٹ میں واپسی کا کوئی ارادہ نہیں، انٹرنیشنل کرکٹ کی کمی محسوس نہیں ہورہی کیوں کہ لیگز کرکٹ سے لطف اندوز ہو رہا ہوں۔
پاکستان کے ٹی ٹوئنٹی کپتان کے حوالے سے محمد عامر نے کہا کہ پی ایس ایل کے میچز میں شاہین کی پیس نظر آرہی ہے جبکہ وہ تھوڑا عرصہ پہلے انجری سے واپس آئے ہیں تو انھیں وقت دینا چاہیے۔
سابق قومی پیسر نے کہا کہ شاہین جب تک لمبے اسپیل نہیں کریں گے انکا ردھم واپس نہیں آئے گا، لمبے اسپیل سے اعتماد ملتا ہے او بولر جو سبق بھول جاتا ہے وہ یاد آجاتا ہے۔
ردھم چار اوور سے نہیں بلکہ لمبے اسپیل سے آئے گا، شاہین پروفیشنل بولر ہیں ان پر کپتانی کا کوئی دباؤ نہیں، یہ تاثر غلط ہے کہ کپتانی کی وجہ سے ان کی بولنگ میں فرق پڑا ہے۔ لاہور قلندرز افغان اسپنر راشد کو مس کر رہے ہیں۔
انجرڈ ہونے والے پیسر حارث رؤف سے متعلق محمد عامر نے کہا کہ پی سی بی سے ان کا معاملہ چل رہا ہے وہ اپنی پرفارمنس کے حوالے سے خود جواب دیں گے۔
انھوں نے واضح کیا کہ کوئی بولر پانچ وکٹیں لے لیکن 50 رنز دیدے تو کیا فائدہ ہوگا یا بیٹر سنچری بنائے اور ٹیم میچ ہار جائے تو اس سے کیا حاصل ہوگا۔ اس لیے میں میچ میں متاثر کن کردار ادا کرنے پر توجہ مرکوز کرتا ہوں۔
عامر نے بولرز کو مشورہ دیا کہ بولنگ بہتر جب ہو گی جب آپ ریڈ بال کرکٹ کھیلیں گے۔ ملک میں بہت پیس والے بولر سامنے آرہے ہیں، کوئی 145 کوئی 140 کی اسپیڈ سے گیند کر رہا ہے لیکن نوجوان فاسٹ بولرز میں اسمارٹ بولنگ صلاحیت کی کمی۔
