فارم ہاؤس پر پانی پینے کیوں آئے؟ لاہور کے علاقے چوہنگ میں سیکیورٹی گارڈ نے فائرنگ کرکے سات سالہ بچے کو قتل کردیا، فرار ہونے والے ملزم کو گرفتار کرلیا گیا۔
تفصیلات کے مطابق لاہور کے نواحی علاقے چوہنگ میں کرکٹ کھیلنے کے دوران سات سالہ بچہ پانی پینے مقامی فارم ہاؤس پر گیا، فارم ہاؤس کے سیکیورٹی گارڈ ملزم نذیر نے فائرنگ کرکے بچے کو قتل کردیا۔
ملزم بچے کو قتل کرنے کے بعد جائے وقوعہ سے فرار ہوگیا تھا، بعد ازاں پولیس نے ملزم کو اوکاڑہ فرار ہوتے ہوئے بس اسٹینڈ سے گرفتار کرلیا۔
واقعہ کا مقدمہ مقتول بچے کے والد کی مدعیت میں درج کیا گیا ہے، چوہنگ تھانے میں درج ہونے والی ایف آئی آر کے مطابق چند روز قبل بھی ملزم نے بچے کو فارم ہاؤس میں پانی پینے سے روکا تھا۔
ملزم نے وقوعہ کو چھپانے کی کوشش کی، محلے داروں کے دیکھنے پر موقع سے فرار ہوگیا، پولیس نے ملزم کو بس اڈے سے گرفتار کیا۔ مقدمہ میں گارڈ نذیر سمیت دو نامعلوم لوگوں کو بھی نامزد کیا گیا ہے۔
