گزشتہ روز گنیز ورلڈ ریکارڈز کی 12 ویں سالگرہ کے موقع پر منعقد کی جانے والی تقریب میں مختلف ریکارڈز کے حامل ہزاروں افراد نے شرکت کی۔ اس موقع پر ایک شخص نے دنیا کی سب سے منفرد چھلانگ لگا کر چائے میں بسکٹ ڈبو کر کھانے کا مظاہرہ کیا۔
برطانیہ سے تعلق رکھنے والے سائمن بیری نے 239 فٹ سے زائد بلندی سے چھلانگ لگاتے ہوئے چائے میں بسکٹ ڈبو کر کھانے کا حیران کن مظاہرہ کیا اور عالمی گنیز ریکارڈز میں اپنا نام درج کروالیا۔
گنیز ورلڈ ریکارڈ کی اس تقریب میں لبنانی شہری نبی کرم نے بھی شرکت کی جن کے پاس ننھی منی کاروں کا دنیا کا سب سے بڑا ذخیرہ موجود ہے۔ اس حوالے سے یہ خود اپنا ہی ریکارڈ توڑ چکے ہیں۔
نبی کرم کے پاس 37 ہزار 777 ننھی منی مختلف اقسام کی گاڑیاں موجود ہیں۔
یہی نہیں انہوں نے تاریخ کے کچھ مشہور واقعات کی منظر کشی کرنے والے منی ایچر ماڈلز بھی اپنے گھر میں جمع کر رکھے ہیں جن کی تعداد 577 ہے اور یہ بھی ان کا ایک منفرد ریکارڈ ہے۔
ان ماڈلز میں فارمولا ون ریسنگ چیمپئن مائیکل شوماخر کی فتوحات سمیت دنیا بھر میں پیش آنے والی جنگوں کی مناظر کے ماڈل بھی شامل ہیں۔
نبی کرم ایک سابق فارمولا ریسنگ ڈرائیور ہیں اور یہاں سے ریٹائر ہونے کے بعد اپنے شوق کو تسکین پہنچانے کے لیے ہی انہوں نے اس منفرد ذخیرے کو جمع کرنا شروع کیا۔
