لاہور: گجرپورہ خاتون زیادتی کیس میں پولیس نے مرکزی ملزم عابد کے والد اور بھائی کو حراست میں لے لیا۔
اے آر وائی نیوز کی رپورٹ کے مطابق گجرپورہ میں خاتون سے زیادتی کے کیس میں اہم پیش رفت ہوئی ہے پولیس نے مرکزی ملزم عابد علی کے والد اکبر اور بھائی قاسم کو حراست میں لے لیا۔
ذرائع کے مطابق مرکزی ملزم عابد کا بھائی قاسم ٹھوکر چوک میں پھلوں کی ریڑھی لگاتا ہے جبکہ ملزم کے والد کو مانگا منڈی میں گھر سے حراست میں لیا گیا۔
ملزم عابد کا والد اکبر، بیٹی اور بھائی قاسم پولیس کی تحویل میں ہیں، بیٹی کو گزشتہ روز اس وقت تحویل میں لیا گیا تھا جب ملزم عابد اور اس کی اہلیہ پولیس چھاپے کے وقت فرار ہوگئے تھے۔
پولیس کا کہنا ہے کہ ملزم عابد کے بارے میں پوچھ گچھ کے لیے اہلخانہ کو حراست میں لیا گیا ہے، اہلخانہ سے بھی تحقیقات کی جارہی ہیں۔
مزید پڑھیں: وقار کے بیان کے بعد ملزم عابد علی سے متعلق پولیس کو اہم معلومات مل گئیں
واضح رہے اس سے قبل ملزم وقار الحسن نے از خود کرائم انوسٹی گیشن ایجنسی (سی آئی اے) دفتر میں پیش ہو کر گرفتاری دی تھی اور صحتِ جرم سے انکار کردیا تھا۔
ملزم کا پولیس کو دئیے گئے بیان میں کہنا تھا کہ میرا اس کیس سے کوئی تعلق نہیں ہے، عابد علی کے کال ریکارڈ سے ٹریس کیا جانے والا میرا نمبر دراصل میرے برادر نسبتی عباس کے پاس ہے، عباس عابد کا ساتھی ہے، میری دوسری سم دوسری سسر کے استعمال میں ہے۔
ملزم وقار کو سی آئی اے ماڈل ٹاؤن سے تفتیش کے لیے نا معلوم مقام پر منتقل کر دیا گیا ہے۔ ملزم کا ڈی این اے کرانے کا فیصلہ کیا گیا ہے، بیان کے بعد پولیس نے برادر نسبتی عباس کی تلاش شروع کر دی ہے۔
خیال رہے کہ بدھ کی رات تین بجے کے قریب گجر پورہ میں خاتون سے اجتماعی زیادتی کا واقعہ پیش آیا تھا، خاتون بچوں کے ساتھ سفر کر رہی تھی، پٹرول ختم ہونے پر گاڑی بند ہو گئی، اس دوران دو ملزمان کھڑی گاڑی کا شیشہ توڑ کر خاتون کو قریبی جھاڑیوں میں لے گئے اور بچوں کے سامنے زیادتی کا نشانہ بنایا، ملزمان نے ایک لاکھ نقدی اور زیورات بھی لوٹ کر فرار ہوگئے تھے۔
