گوجرانوالہ: پنجاب کے شہر گوجرانوالہ کے علاقے کوٹ لدھا کے قریب 2 مسافر وین ایک ڈمپر سے ٹکرا گئیں، جس کے نتیجے میں 12 افراد جاں بحق ہو گئے۔
تفصیلات کے مطابق گوجرانوالہ میں کوٹ لدھا کے قریب خوف ناک حادثہ پیش آیا ہے، دو مسافر وین ایک ڈمپر سے ٹکرانے سے بارہ افراد جانوں سے ہاتھ دھو بیٹھے جب کہ حادثے میں 8 افراد زخمی ہو گئے۔
ریسکیو ذرائع کا کہنا ہے کہ حادثے کا ذمہ دار ڈمپر گوجرانوالہ سے حافظ آباد کی طرف رانگ سائیڈ پر جا رہا تھا، جب کہ دونوں مسافر وینیں حافظ آباد سے گوجرانوالہ جا رہی تھیں۔
ریسکیو ذرائع کے مطابق زخمیوں کو ڈسٹرکٹ اسپتال منتقل کر دیا گیا ہے، جاں بحق افراد میں زیادہ تر کا تعلق ایک ہی خاندان سے بتایا جاتا ہے۔
