گوجرانوالہ : سیشن کورٹ کے احاطے میں فائرنگ سے پیشی پر آیا ہوا قیدی ہلاک ہوگیا، ملزم مو قع سے فرار ہونے میں کامیاب ہوگیا، پولیس نے نعش کو تحویل میں لے کر پوسٹ مارٹم کے لیے ہسپتال منتقل کر دیا۔
تفصیلات کے مطابق گوجرانوالہ میں سیشن کورٹ کے احاطے میں فائرنگ کا واقعہ پیش آیا ہے، فائرنگ سے پیشی پر آیا ہوا قیدی موقع پر جان بحق ہو گیا جبکہ فائرنگ کرنے والا ملزم موقع سے فرار ہو گیا۔
فائرنگ کے بعد سیشن کورٹ میں بھگدڑ مچ گئی جبکہ واقعہ کے بعد پولیس کی بھاری نفری موقع پر پہنچ گئی اور سیشن کورٹ کے تمام دروازوں کو بند کر دیا گیا جبکہ پولیس نے نعش کو اپنی تحویل میں لیکر پوسٹ مارٹم کے لیے سول ہسپتال منتقل کر دیا ہے۔
پولیس کے مطابق عمر قید کا اسیر دیگر مقدمات کی سماعت کے لیے پیشی پر آیا ہوا تھا جبکہ مقتول نبیل پیشی بھگت پر باہر نکلا تو پہلے سے گھات لگائے شخص نے نبیل پر فائرنگ کر دی جس سے عمر قید کا قیدی نبیل موقع پر جاں بحق ہو گیا جبکہ ملزم موقع سے فرار ہوگیا۔
