کامونکی میں دو کمسن بہن بھائی کی موت کا معمہ حل ہوگیا، بچوں کے والد نے ہی دوسری شادی کرنے کیلئے اپنے دونوں بچوں کی جان لے لی۔
تفصیلات کے مطابق کامونکی کے علاقے مسلم گنج میں 3 ماہ قبل 3 سالہ حنین اور 6 ماہ کی عنشرہ مبینہ طور پر زہریلا دودھ پینے سے جاں بحق ہوگئی تھی، بچوں کی والدہ نے الزام لگایا تھا کہ شوہر نے دوسری شادی کیلئے بچوں کو زہر دیکر قتل کیا ہے۔
والدہ کی الزام کے بعد تحقیقات کے دوران دونوں بچوں کی قبر کشائی کرواکر پوسٹ مارٹم کروایا گیا، بچوں کی زہر سے موت ثابت ہونے پر ملزم کو گرفتار کر کے مقدمہ درج کرلیا گیا۔
والدہ کا کہنا تھا کہ شوہر اکثر گھر میں لڑائی جھگڑے کرتا تھا، پولیس کا کہنا ہے کہ دوسری شادی کیلئے باپ نے بچوں کو زہر دیا تھا۔
واضح رہے کہ 3 ماہ قبل کھانا کھانے سے والدہ سمیت 3 بچوں کی حالت غیر ہوئی تھی، بچے اسپتال میں دم توڑ گئے تھے جبکہ ماں بچ گئیں تھی، والد نے جلد بازی میں بچوں کی تدفین کردی تھی۔
