خوشی کا کوئی بھی موقع ہو یا کوئی بھی تہوار ہو منہ میٹھا کرنے کے لیے عام طور پر ہر گھر میں گلاب جامن مٹھائی کا ذکر ضرور ہوتا ہے۔
دیسی مٹھائیوں میں گلاب جامن نہایت اہمیت کا حامل سمجھا جاتا ہے، عید کا کوئی تہوار ہو یا پھر شادی کی تقریب غرض یہ کہ رزلٹ کی خوشی اور کسی کی آمد پر بھی یہ مٹھائی ہمارے درمیان ضرور موجود ہوتی ہے۔
دکان سے ملنے والی گلاب جامن کی لذت علیحدہ ہوتی ہے مگر دماغ اس پر کھٹکتا رہتا ہے کہ آیا یہ صحت کے اصولوں کو مدنظر رکھ کر بنائے گئے ہیں یا نہیں؟، گلاب جامن کھانے کے شوقین افراد کی یہ مشکل افضل نظامی صاحب نے پوری کردی۔
اے آر وائی ذوق پر نشر ہونے والے پروگرام کچھ میٹھا کچھ نمکین میں پاکستان کے مایہ ناز باورچی افضل نظامی نے گھر میں گلاب جامن تیار کرنے کا آسان طریقہ بتایا۔
گھر میں گلاب جامن تیار کرنے کے لیے درج ذیل اشیاء درکار ہیں۔
گلاب جامن بنانے کے اجزاء
سوکھا دودھ (پاؤڈر والا دودھ) 250 گرام
تازہ دودھ 170 گرام
گھی 50 گرام
سوجی 50 گرام
میدہ 75گرام
الائچی کے دانے
پھیٹا ہوا انڈے 2 عدد
بیکنگ سوڈا 2 چٹکی
زعفران ایک چٹکی
چینی ایک کلو گرام
پانی آدھا کلو گرام
گھی 1 کلو (فرائی کرنے کے لیے)
طریقہ کار
چولہے پر فرائی پان رکھ کر اُس میں پانی بھر کر چینی ڈال دیں اور اُس کا شیرا بنالیں۔
کھوئے میں مکس آٹے کو ڈالیں اور اُس میں بیکنگ سوڈا، الائچی، بادام، پستا، زعفران ڈالیں، اب تمام اشیاء کو گوند کر چھوٹی چھوٹی بالیں بنا لیں۔
فرائی پان میں گھی ڈال کر ان بالز کو تھوڑی دیر کے لیے چولہے پر چھوڑ دیں اور جب یہ اپنا کلر تبدیل کر کے کتھی کلر اختیار کرلیں تو اسے برتن سے نکال کر شیرے میں ڈال دیں۔
دس پندرہ منٹ بعد اُسے میٹھے شیرےمیں سے نکالیں مزیدار گلاب جامن تیار ہیں۔
ویڈیو دیکھیں
