اسلام آباد: وفاقی وزیر ہوا بازی غلام سرور خان کا کہنا ہے کہ اداروں پر حملے ن لیگ کی تاریخ ہے، ن لیگ پر غداری کا مقدمہ بھی بننا چاہئے۔
اے آر وائی نیوز کی رپورٹ کے مطابق وفاقی وزیر ہوا بازی غلام سرور خان نے کہا ہے کہ ن لیگ نے ہر ادارے اور ہر کام کو سیاسی بنایا، اداروں کو کمزور کرنا پاکستان کی سالمیت کو کمزور کرنا ہے۔
انہوں نے کہا کہ 11 اور 12 تاریخ کو نیب میں پیشی کا فرق سب نے دیکھا، گاڑیوں میں پتھر لے کر آئے یہ ن لیگ کی تاریخ ہے، نیب آفس کے وقار کا خیال رکھنا چاہئے تھا۔
وفاقی وزیر نے کہا کہ پیپلزپارٹی اپنے نظریہ سے ہٹ گئی ہے، پیپلزپارٹی میں بلاول بھٹو کے آنے سے بھی فرق نہیں پڑا، سندھ کے شہریوں کا جان بوجھ کر استحصال کیا گیا۔
غلام سرور خان کے مطابق پیپلزپارٹی کی سندھ میں پہلے جیسی پوزیشن نہیں رہی ہے۔
یاد رہے مریم نواز کی نیب میں پیشی کے موقع پر صورتحال کشیدہ ہوگئی تھی، نیب دفتر کے باہر لیگی کارکنان کی جانب سے پولیس پر پتھراؤ کیا گیا جبکہ لیگی کارکنوں نے نیب دفتر کے باہر رکاوٹیں ہٹادیں تھیں۔
پولیس کی جانب سے لیگی کارکنوں کومنتشر کرنے کیلئے نیب آفس کے باہر واٹر کینن بھی طلب کی تھی، لیگی کارکنان گاڑی ایل ای 3378میں پتھر سےبھرے شاپرلیکرآئے تھے ، لیگی کارکنوں نے گاڑی کےاندر سے پتھر نکال کر پولیس پر برسائے تھے۔
لیگی کارکنوں کے پتھراؤ کے باعث نیب دفتر پرکھڑیوں کے شیشےٹوٹ گئے جبکہ لیگی کارکنان نے نیب دفتر کے باہر بیریئر بھی توڑنےکی کوشش کی تھی۔
