کراچی: گلستان جوہر میں ڈمپر کی زد میں آکر جاں بحق ہونے والی خاتون کی شناخت ہوگئی۔
گزشتہ دوپہر کراچی کے علاقے گلستان جوہر میں ایک افسوسناک واقعہ پیش آیا جہاں ایک اسکوٹی پر سوار خاتون بارش کے پانی میں سلپ ہوگئیں اور اس دوران پیچھے سے آنے والے ڈمپر نے خاتون کو کچل دیا جس سے وہ موقع پر ہی جاں بحق ہوگئیں تھی۔
تاہم اب پولیس کا اس حوالے سے کہنا ہے کہ جاں بحق خاتون کی شناخت 23 سالہ سارہ کے نام سے ہوئی، خاتون اسکوٹی پر نہیں بکہ موٹر سائیکل پر سوار تھی۔
کراچی میں اسکوٹی چلانے والی خاتون جاں بحق
پولیس کا کہنا ہے کہ ڈمپر کا ڈرائیور ملزم فرار ہے، اب تک مقدمہ درج نہیں کیا گیا، سارہ کے تایا نے کہا کہ ہم نے قانونی کارروائی نہ کرنے کا ارادہ کیا ہے، ہم سے ڈمپر مالک نے رابطہ کیا ہے، معاف کرنے کا ارادہ ہے اس لیے مقدمہ درج نہیں کروایا جائے گا۔
دوسری جانب عینی شاہدین کا کہنا ہے کہ سارا اقبال کی موٹر سائیکل ممکنہ طور پر سلپ ہوئی، سارا اقبال ڈمپر کے پچھلے ٹائروں کی زد میں آکر جاں بحق ہوئی۔
