The news is by your side.

Advertisement

طوفانی جھکڑ، ایئرپورٹ کے شیشے ٹوٹ کر بکھر گئے

ایئرپورٹ کی ناقص تعمیر کا پول ایک بار پھر کھل گیا، واقعے میں کسی کے زخمی ہونے کی اطلاع نہیں

اسلام آباد: وفاقی دار الحکومت میں طوفانی ہواؤں اور جھکڑوں کی وجہ سے ایئر پورٹ کے شیشے ٹوٹ گئے۔

اے آر وائی نیوز کے مطابق اسلام آباد میں طوفانی جھکڑوں سے اسلام آباد ایئرپورٹ کے داخلی دروازوں کو شدید نقصان پہنچا ہے، تیز جھکڑوں کی وجہ سے داخلی راستوں کے شیشے بھی ٹوٹ گئے۔

تیز ہواؤں نے ایئر پورٹ پر لگی فار سیلنگ کو بھی نقصان پہنچایا، اور فار سیلنگ کی چھت گر گئی، تاہم کسی کے زخمی ہو نے کی اطلاع موصول نہیں ہوئی ہے۔

اس واقعے سے ایئرپورٹ کی ناقص تعمیر کا پول ایک بار پھر کھل گیا ہے، تیز ہواؤں سے ڈومیسٹک ڈپارچر لاؤنج کے اسموکنگ زون پر لگا شیشہ بھی ٹوٹ گیا، ناقص سیلنگ تیز ہواؤں کا زور برداشت نہ کر سکی ، سی ون ریموٹ ایریا کی چھت کی سیلنگ بھی نیچھے آ گری۔

واضح رہے کہ یکم مئی 2018 کو اس وقت کے وزیر اعظم شاہد خاقان عباسی نے نیو اسلام آباد انٹرنیشنل ایئر پورٹ کا افتتاح کیا تھا، یہ پاکستان میں سب سے بڑا اور جدید ترین ایئرپورٹ ہے۔

خیال رہے کہ گزشتہ رات سے اسلام آباد اور گرد و نواح میں تیز جھکڑوں کے ساتھ موسلا دھار بارش کا سلسلہ شروع ہوا ہے، ہری پور، راولپنڈی، میرپور آزاد کشمیر، کوئٹہ، جہلم، مستونگ، گجرات، جلالپور بھٹیاں میں بھی تیز بارش ہو رہی ہے۔

چلاس اور گرد و نواح میں بھی رات گئے بارش سے موسم خوش گوار ہو گیا ہے، دیامر کے تینوں تحصیلوں میں بارش کے ساتھ پہاڑوں پر برف باری بھی شروع ہو گئی ہے، مضافاتی علاقوں میں سیلابی ریلے سے رابطہ سڑکیں متاثر ہو گئیں، بارشوں کے باعث دیامر، کوہستان میں شاہر اہ قراقرم پر لینڈ سلائیڈنگ کا بھی خدشہ ہے۔

Comments

یہ بھی پڑھیں