گوادر: مکران ڈویژن کے اہم شہر گوادر میں مولانا ہدایت الرحمان کی ‘حق دو تحریک’ نے واضح برتری حاصل کر کے قوم پرست حلقوں کے لیے مشکل کھڑی کر دی ہے۔
تفصیلات کے مطابق گوادر ڈسٹرکٹ کے چاروں ایم سیز اور 13 یوسیز کے 157 انتخابی حلقوں کے نتائج مکمل ہو گئے ہیں، غیر حتمی غیر سرکاری نتائج کے مطابق حق دو تحریک پینل کے 60 امیدواروں نے کامیابی حاصل کر کے پہلی پوزیشن حاصل کر لی، قوم پرستوں کا چار جماعتی اتحاد شکست کھا گیا ہے۔
دوسرے نمبر پر اس ضلع سے 56 آزاد امیدوار کامیاب ہوئے ہیں، جب کہ بی این پی مینگل کے 30 امیدوار کامیاب ہو گئے، نیشنل پارٹی کے 7، اور جے یو آئی (ف) صرف ایک نشست حاصل کرنے میں کامیاب رہی، ضلع کے تین حلقوں میں انتخابات نہیں ہو سکے ہیں۔
خیال رہے کہ حق دو تحریک جماعت اسلامی کی حمایت یافتہ موومنٹ ہے، جس کی قیادت مولانا ہدایت الرحمان کر رہے ہیں، مولانا بے خوفی کے ساتھ گوادر کے باسیوں کے حقوق کے لیے ایک عرصے سے آواز بلند کر رہے ہیں، جس کے سبب مقامی لوگوں بالخصوص ماہی گیروں میں انھیں بے پناہ مقبولیت حاصل ہے۔
حق دو تحریک کی جانب سے گوادر کے بلدیاتی انتخابات میں کامیابی کا جشن منایا جا رہا ہے، ذرائع کے مطابق سرکاری نتائج کا اعلان آئندہ دو روز میں کیا جائے گا جس کا باقاعدہ نوٹیفکیشن بھی جاری کیا جائے گا۔