واشنگٹن: امریکی امیگریشن حکام نے ایچ ون بی (H-1B) ویزا رکھنے والوں کو خوش خبری سنا دی ہے۔
تفصیلات کے مطابق ایچ ون بی ویزے سے متعلق امریکا نے اہم قدم اٹھا لیا ہے، جو بائیڈن انتظامیہ نے امیگریشن کے حوالے سے مثبت قدم اٹھاتے ہوئے ایچ ون بی ویزا ہولڈر کے شریک حیات کو بھی کام کرنے کا پرمٹ فراہم کرنے کا فیصلہ کر لیا ہے۔
امریکی میڈیا کے مطابق حالیہ برسوں میں L-1 یا H-1B ویزا ہولڈرز کے شریک حیات کے لیے اچھی خبریں نایاب رہی ہیں، یو ایس سٹیزن شپ اینڈ امیگریشن سروسز نے کام کی اجازت کے لیے طویل پروسیسنگ میں تاخیر کے سبب ملازمت پر مبنی گرین کارڈز کے انتظار کو مزید سخت بنا دیا تھا، جس کے نتیجے میں امریکا میں کام کرنے والوں کو اپنے اعلیٰ ہنر والے شریک حیات کی وجہ سے کام روکنا پڑا اور یوں انھوں نے ملازمتیں کھو دیں۔
اب امریکا نے H-1B ویزا رکھنے والوں کے شریک حیات کو خودکار کام کا اجازت نامہ فراہم کرنے پر رضامندی ظاہر کی ہے، اس فیصلے سے ہزاروں ہندوستانی نژاد امریکی خواتین کو فائدہ پہنچے گا۔
واضح رہے کہ بارک اوباما انتظامیہ نے ایچ-1 ویزا رکھنے والوں کو میاں بیوی کے مخصوص زمروں میں کام کرنے کا حق فراہم کیا تھا۔ اب تک 90 ہزار سے زیادہ ایچ-4 ویزا ہولڈرز، جن میں بڑی تعداد میں ہندوستانی نژاد امریکی خواتین بھی شامل ہیں، کو کام کی اجازت مل چکی ہے۔
