ملتان : جمیعیت علماء اسلام (ف) کے مرکزی رہنما حافظ حسین احمد نے کہا ہے کہ وزیراعظم کی جانب سے ٹیکس چوروں کو ٹیکس چھوٹ کا اعلان دہشت گردی کے خلاف آپریشن کو ناکام کرنے کی کوشش ہے۔
ملتان میں پریس کانفرنس کرتے ہوئے ان کا کہنا تھا کہ دہشت گردوں کو مالی انصاف فراہم کرنے والوں کو سہولت کار کا نام دیا گیا ہے اور کل وزیراعظم نے سہولت کاروں کو سہولت دینے کا اعلان کیا ہے یعنی ملکی دولت لوٹنے والے اپنا کالا دھن سفید کراسکتے ہیں اور ان کی کوئی باز پرس نہیں ہوگی۔
وزیراعظم نے مالیاتی این آراو متعارف کرادیا ہے۔ انہوں نےکہا کہ نریندر مودی کے دورہ پاکستان کے موقع پر تمام ادارے ایک صفحے پر نہیں تھے ملاقات میں عسکری قیادت میں سے کوئی شریک نہیں ہوا۔
انہوں نے کہا کہ واجپائی کے دورہ کے موقع پر بھی تمام ادارے ایک صفحے پر نہیں تھے تو نتیجہ سب نے دیکھا تھا۔
حافظ حسین احمد نے کہا کہ ایک طرف ہند ہمیں گلے لگارہا ہے تو دوسری طرف سندھ گلے پڑ رہا ہے۔۔۔ انہوں نے کہا کہ صورتحال یہ ہے کہ ایک شریف مودی کو یہاں ملتا ہے تو دوسرا شریف اگلے روز کابل چلا جاتا ہے۔
انہوں نے کہا کہ انڈیا کی خارجہ پالیسی مضبوط ہے جبکہ ہماری پالیسی بیساکھیوں کے سہارے چل رہی ہے۔
