جمیعت علماء اسلام (جے یو آئی) کے مرکزی رہنما حافظ حسین احمد انتقال کرگئے، وہ گزشتہ کافی عرصے سے علیل تھے۔
جے یو آئی نے بھی اپنے آفیشل فیس بک اکاؤنٹ سے ان کے انتقال کی تصدیق کردی، مرحوم کے اہل خانہ کا کہنا ہے کہ ان کی نماز جنازہ کا اعلان جلد کیا جائے گا، اہل خانہ کے مطابق وہ گزشتہ کچھ عرصے سے علیل تھے۔
حافظ حسین احمد سینیٹر اور رکن قومی اسمبلی بھی رہ چکے ہیں، مرحوم کے بیٹے منیر احمد کے مطابق وہ طویل عرصے سے گردوں کے عارضے میں مبتلا تھے۔
مرحوم کا شمار مولانا فضل الرحمان کے انتہائی قریبی ساتھیوں میں ہوتا تھا، سماجی رابطے کی ویب سائٹ فیس بک پر ان کے انتقال کی خبر جاری کی گئی۔
جے یو آئی کے سینئر رہنما کے انتقال کی خبر سن کر جمیعت علماء اسلام کے رہنماؤں اور کارکنان کی جانب سے شدید رنج و غم کا اظہار کیا گیا۔
مولانا فضل الرحمان نے جے یو آئی کے سینئر اور ہر دلعزیز رہنما کی وفات پر اظہار افسوس کرتے ہوئے کہا ہے کہ ان کی وفات سے حسین یادوں کا ایک باب ختم ہوگیا۔
انہوں نے کہا کہ جوانی سے بڑھاپے تک ایک ہی پلیٹ فارم سے جدوجہد ہمیشہ یاد رہے گی، حافظ صاحب مرحوم زیرک، حاضرجواب، سیاسی، نظریاتی اور پارلیمانی رہنما تھے۔
جے یو آئی کے سربراہ کا کہنا تھا کہ مرحوم کے فرزندان، جے یو آئی کارکنوں سے اظہار تعزیت کرتا ہوں اور غم کی اس گھڑی میں اہل خانہ کے ساتھ برابر کا شریک ہوں۔
مزید پڑھیں : جے یو آئی نے حافظ حسین احمد کو عہدے سے کیوں ہٹایا تھا؟
یاد رہے کہ نومبر 2020 میں جے یو آئی (ف) کی شوریٰ نے حافظ حسین احمد کو ہٹا کر ان کی جگہ اسلم غوری کو قائم مقام ترجمان مقرر کیا تھا اور نواز شریف کے بیانیے کی نفی کرنے پر ان کو شوکاز نوٹس جاری کیا گیا تھا۔
اس حوالے سے ذرائع کا کہنا تھا کہ حافظ حسین احمد کو عہدے سے ہٹانے کا فیصلہ جے یو آئی کی مجلس شوریٰ کے اجلاس میں کیا گیا تھا۔
واضح رہے کہ حافظ حسین احمد نے نواز شریف کے کوئٹہ میں بیان سے اختلاف کیا تھا، جے یو آئی نے حافظ حسین کے بیان کو ذاتی قرار دے کر لاتعلقی کی تھی۔
