کراچی : عالمی منڈی میں تیل کی قیمتوں میں کمی کے بعد پیٹرول کی فی لیٹر قیمت میں 30 روپے کمی کا مطالبہ سامنے آگیا۔
تفصیلات کے مطابق عالمی منڈی میں تیل کی قیمتیں 5 فیصد تک گر گئی ، جس کے بعد برطانوی خام تیل برینٹ آئل 73 ڈالرز فی بیرل پر فروخت ہو رہا ہے اور امریکی خام تیل ڈبلیو ٹی آئی 67 ڈالرز فی بیرل کی سطح پر موجود ہے۔
امیر جماعت اسلامی حافظ نعیم الرحمان نے اپنے بیان میں کہا ہے کہ خام تیل کی قیمت عالمی مارکیٹ میں کم ہو کر 67 ڈالر فی بیرل سے نیچے آگئی، فوری طور پر پیٹرول کی فی لیٹر قیمت میں 30 روپے کمی کی جائے۔
ان کا کہنا تھا کہ پٹرولیم لیوی کی مد میں 60 روپے فی لیٹر اضافی ٹیکس وصول کیا جا رہا ہے، یہ ایک ناجائز ٹیکس ہے، اسے ختم کیا جائے تو معاشی ایکٹیویٹی بڑھے گی۔
خیال رہے حکومت کی جانب سے آج پیٹرولیم مصنوعات کی نئی قیمتوں کا اعلان کیا جائے گا، امکان ظاہر کیا جارہا ہے عالمی منڈی میں تیل کی قیمتوں میں کمی کے باعث عوام کو ریلیف ملے گا۔
