کراچی : جماعت اسلامی کراچی کے امیر حافظ نعیم الرحمان نے کہا ہے کہ آج یہ شہر لٹیروں کے رحم وکرم پر ہے، ہم صحت اور تعلیم کے اداروں کو بہتر بنائیں گے۔
یہ بات انہوں نے ملیر کے مختلف علاقوں کے دورہ اور بعد ازاں ضلع کورنگی کے امیدواروں سے خطاب کرتے ہوئے کہی۔
انہوں نے کہا کہ شہر کا کوئی سرکاری اسکول اس قابل نہیں کہ لوگ بےفکر ہوکر اپنے بچے اسکول میں تعلیم حاصل کرنے کیلئے بھیج سکیں۔
حافظ نعیم کا کہنا تھا کہ وہ لوگ کہاں ہیں جو شہر میں گولیاں چلاتے تھے، آج ہم شہر کیلئے لڑرہے ہیں، ہم چاہتے ہیں کہ تمام کام قانون کے دائرے میں ہوں۔
انہوں نے کہا کہ ہم نہیں چاہتے کہ نوجوانوں کو اسلحہ دیں، آج یہ شہر لٹیروں کے رحم وکرم پر ہے، پولیس بھی پوری طرح ناکام ہوچکی ہے۔
کراچی کے امیر کا کہنا تھا کہ ہم اب شہر بھر کے گلی محلوں میں کمیٹیاں بنائیں گے اور صحت اور تعلیم کے اداروں کو بہتر بنائیں گے۔
حافظ نعیم نے کہا کہ کل ہونے والے جلسہ عام میں آئندہ کے لائحہ عمل کا اعلان کریں گے، شاہراہ قائدین کا جلسہ شہر کے مستقبل کا تعین کرے گا۔
