اسلام آباد : جماعت اسلامی کراچی کے امیر حافظ نعیم الرحمان نے کہا ہے کہ کراچی کا میئر جماعت اسلامی کا ہی بنے گا، پیپلز پارٹی کو شہر پر قبضہ نہیں کرنے دیں گے۔
ان خیالات کا اظہار انہوں نے جماعت اسلامی کے زیر اہتمام اسلام آباد کے نادرا چوک پر کراچی میئر کے انتخاب کے خلاف ہونے والے احتجاجی مظاہرے سے خطاب کرتے ہوئے کیا، اس موقع پر جماعت اسلامی کے کارکنان کی بڑی تعداد موجود تھی جو الیکشن کمیشن اور پیپلزپارٹی کے خلاف شدید نعرے بازی کررہے تھے۔
حافظ نعیم الرحمان نے کہا کہ چیف الیکشن کمشنر شفاف انتخابات کرانے میں ناکام ہوئے ہیں، چیف الیکشن کمشنر نے کسی قانون پاسدادی نہیں کی، تم ایک میئر کا انتخاب نہیں کراسکتے تو پورے پاکستان کا الیکشن کیسے کراؤ گے؟
انہوں نے پیپلزپارٹی کو تنقید کا نشانہ بناتے ہوئے کہا کہ پیپلزپارٹی امیدواروں نے3لاکھ ووٹ لئے اور ہم نے9لاکھ، مینڈیٹ تمہارے پاس ہے یا ہمارے پاس؟ پیپلزپارٹی والے کہتے ہیں ہم نے بہت خدمت کی ہے۔
رہنما جماعت اسلامی کا کہنا تھا کہ پیپلزپارٹی والے دیکھ لیں عوام کا جم غفیر ہمارے ساتھ کھڑا ہے، ملک کے ہر علاقے اور گاؤں سے لوگ کراچی میں آباد ہیں، ہم تمہیں اس شہر پر قبضہ نہیں کرنے دینگے، کچھ لوگ ہمیں تقسیم کرنا چاہتے ہیں لیکن یہاں بسنے والے سب متحد ہیں، یہ کامیاب سیاستدان نہیں بلکہ جمہوریت کے قاتل ہیں۔
حافظ نعیم الرحمان نے کہا کہ ہم نے سوچا تھا کہ شاید حالات بدل گئے ہیں کچھ سیکھ جائیں گے
لیکن سعیدغنی جیسے لوگوں نے بلاول کے پراجیکٹ کو ٹیک آف سے پہلے ہی کریش کردیا۔ کراچی شہر میں میئر جماعت اسلامی کا ہی بنے گا۔
انہوں نے کہا کہ یہ جمہوریت پر شپ خون مارنے والے لوگ ہیں، جمہوریت کے قاتل کو کامیاب سیاستدان کہتے ہیں، 1965سے آج تک پیپلزپارٹی کا طریقہ کار نہیں بدلا، پیپلز پارٹی نے مینڈیٹ تسلیم نہیں کیا جس سے ملک ٹوٹ گیا، اسمبلیوں کی سیٹوں کیلئے سیاستدانوں کی منڈی لگانا پیپلز پارٹی کا خاصہ ہے۔
