کراچی : جماعت اسلامی کراچی کے امیر حافظ نعیم الرحمان نے کہا ہے کہ ایم کیو ایم نے اصول بنایا ہے تو پی ڈی ایم کی گود سے بھی اتر جائے۔
یہ بات انہوں نے متحدہ قومی موومنٹ کی جانب سے کراچی اور حیدرآباد کے بلدیاتی انتخابات کے بائیکاٹ کے فیصلے پر اپنے ردعمل میں کہی۔
اے آر وائی نیوز سے خصوصی گفتگو کرتے ہوئے انہوں نے کہا کہ ایم کیوایم کو چاہیے تھا کہ انتخابات میں حصہ لے کر عوام کا سامنا کرتی لیکن ایم کیوایم ضمنی انتخابات میں بالکل فارغ ہوچکی تھی۔
حافظ نعیم الرحمان نے کہا کہ میری خواہش ہے کہ ایم کیوایم بلدیاتی انتخابات میں حصہ لے، ایم کیوایم کو یقین ہی نہیں تھا کہ انتخابات ہو بھی سکتے ہیں۔
ایک سوال کے جواب میں انہوں نے کہا کہ شاید انہیں کوئی یقین دہانی کرائی گئی ہوگی کہ مل جاؤ، یہ بلدیاتی انتخابات ملتوی ہوجائیں گے۔
جماعت اسلامی کراچی کے امیر کا کہنا تھا کہ جسے برا کہنا چاہیے ایم کیوایم اسی کی گود میں بیٹھی ہوئی ہے، حلقہ بندیوں سے جماعت اسلامی بھی مطمئن نہیں ہے۔
انہوں نے کہا کہ ایم کیوایم آرڈیننس کے چکر میں تھی اور ہم بھی اس پر ردعمل کیلئے پوری طرح تیار تھے، بلدیاتی انتخابات کا ہونا کراچی کے عوام کی کامیابی سمجھتا ہوں۔
حافظ نعیم الرحمان نے مزید کہا کہ حقیقت یہ ہے کہ لوگ پیپلزپارٹی کو پسند ہی نہیں کرتے، ایم کیوایم نے اصول بنایا ہے تو پی ڈی ایم کی گود سے بھی اتر جائے۔
