عمر کے ساتھ ساتھ یا کسی اور وجہ سے کم عمری میں ہی بالوں کی سفیدی لوگوں کو تشویش میں مبتلا کردیتی ہے جس کو چھپانے کیلئے بالوں کو رنگنا ایک عام سی بات ہے۔
اس کے علاوہ آج کل فیشن کے لیے بھی بالوں کو رنگوایا جاتا ہے اور ایسا ایک یا دو بار نہیں بلکہ متعدد بار کیا جاتا ہے جو یقیناً بالوں کی صحت کیلئے نقصان دہ ہے۔
اے آر وائی نیوز کے پروگرام باخبر سویرا میں ڈرماٹولوجسٹ ڈاکٹر خرم مشیر نے ناظرین کو بالوں کو ڈائی کرنے کے طریقے اور ان کی صحت کے حوالے سے اہم اور مفید مشورے دیے۔
انہوں نے بتایا کہ بال کلر کروانا اب بہت آسان ہوگیا ہے مگر یہ جان لیں کہ یہ کوئی مستقل حل نہیں، پہلے لوگ بالوں میں تیل لازمی لگایا کرتے تھے لیکن اب اس کا رجحان نہ ہونے کے برابر ہے۔
مولی کا تیل بنانے کا طریقہ
ڈاکٹر خرم مشیر کا کہنا تھا کہ اگر آپ کے بال سفید ہونا شروع ہوگئے ہیں تو مولی کا تیل استعمال کریں، اس کو تیار کرنے کا طریقہ یہ ہے کہ آدھا کلو مولی کے تیل میں چار چمچ سرمہ اور چار چمچ اجوائن اس کے علاوہ تھوڑی سی کلونجی اور ایک چٹکی گلابی نمک شامل کرلیں۔
انہوں نے بتایا کہ ان تمام اشیاء کو ملاکر اچھی طرح پکا لیں اور اس کو ایک بوتل میں بھر کے ایک دن کیلیے دھوپ میں رکھ دیں۔
ڈاکٹر خرم نے بتایا کہ اس تیل کی بالوں میں اچھی طرح مالش کریں اس سے بالوں کی سفیدی کا خاتمہ ہوگا اور نئے آنے والے بال بھی کالے ہوں گے اس دوران لکڑی کا کنگھا استعمال کریں۔
