سعودی عرب میں دنیا بھر سے لاکھوں کی تعداد میں عازمین حج کی آمد کا سلسلہ جاری ہے، عازمین حج کو بہترین خدمات فراہم کرنے کے لئے خاص اقدامات کئے گئے ہیں۔
سعودی خبر رساں ادارے سبق نیوز کے مطابق سعودی محکمہ پاسپورٹ اینڈ امیگریشن ’جوازات‘ کے ترجمان میجر ناصر العتیبی نے اس حوالے سے بتایا کہ ’مختلف ممالک سے آنے والے عازمین کی خدمت کیلیے 138 زبانوں میں فوری ترجمہ کرنے کی ڈیوائسز اہلکاروں کو فراہم کی گئی ہیں‘۔
میجر ناصر العتیبی کا کہنا تھا کہ جوازات میں بہتری کے عمل کو جاری رکھنے کے بعد ہرحج سیزن کے بعد آئندہ سیزن کے لیے تیاریاں شروع کردی جاتی ہیں تاکہ سابقہ تجربے کی روشنی میں خدمات کے معیار کو مزید بہتر کیا جاسکے۔
میجر ناصر العتیبی نے کہا کہ اب تک مختلف ممالک سے 2 لاکھ 67 ہزار سے زائد عازمین مملکت پہنچ چکے ہیں جن میں فضائی، بری اور سمندری راستے سے آنے والے شامل ہیں۔
دوسری جانب حرمین شریفین انتطامیہ کی جانب سے حج سیزن کے آغاز پر غلاف کعبہ کو بلند کردیا گیا جس کا مقصد حج کے رش میں اسے نقصان سے بچانا ہے۔
تفصیلات کے مطابق برسوں سے جاری روایت پر عمل کرتے ہوئے غلاف کعبہ تقریباً 3 میٹر اونچا کرکے نیچے والے حصے کو سفید کپڑے سے ڈھانپ دیا گیا ہے جسے ’احرام‘ کہا جاتا ہے۔
’سعودی عرب دنیا کی اہم ترین طاقت ہے‘
گزشتہ سال کی طرح اس بار بھی یہ عمل حج سے قبل احتیاطی تدابیر کے ساتھ مسجد الحرام اور مسجد نبوی کی جنرل پریذیڈنسی کے سربراہ اعلیٰ شیخ ڈاکٹرعبدالرحمٰن السدیس کی زیر نگرانی مکمل کیا گیا ہے۔
