سعودی عرب میں حج سیزن 2025 کا آغاز ہوچکا ہے، دنیا بھر سے عازمین حج کی آمد کا سلسلہ جاری ہے،روٹ ٹو مکہ انیشیٹیو کے تحت پاکستان سے پہلی پرواز جدہ پہنچ گئی۔
سعودی خبر رساں ادارے کی رپورٹ کے مطابق گزشتہ روز 310 عازمین حج اسلام آباد سے جدہ کے کنگ عبدالعزیز ایئرپورٹ پہنچ گئے۔ وفاقی وزیر مذہبی امور سردار محمد یوسف، قونصل جنرل خالد مجید، ڈی جی حج عبدالوہاب سومرو و دیگر افسران نے استقبال کیا گیا۔
واضح رہے کہ سعودی عرب نے روٹ ٹو مکہ اینیشیٹو میں مالدیپ کو بھی شامل کرنے کا فیصلہ کیا ہے۔
رپورٹ کے مطابق مالدیپ سے آنے والے عازمین حج اینیشیٹو سے فائدہ سکیں گے، اینیشیٹو کا مقصد مالدیپ کے عازمین کو بہترین سہولیات فراہم کرنا ہے۔
مالدیپ کی وزارت اسلامی أمور کا اس حوالے سے کہنا ہے کہ ملک کے بین الاقوامی ہوائی اڈوں پر مالدیپ کے عازمین حج کی سفری کارروائیاں مکمل کی جائیں گی۔
اینیشیٹو کی مدد سے مالدیپ کے عازمین حج جدہ یا مدینہ منورہ پہنچنے پر انہیں مزید سفری کارروائی کا سامنا نہیں کرنا پڑے گا۔
عازمین جدہ یا مدینہ ایئرپورٹ سے سیدھا اپنے ہوٹلوں کی طرف روانہ ہوجائیں گے، جہاں انہیں ان کا سامان مل جائے گا۔
دوسری جانب سعودی عرب میں ادارہ حرمین کے شعبہ دینی امور کی جانب سے حج آپریشنل پلان جاری کردیا گیا جو 120 اقدامات پر مشتمل ہے۔ منصوبے کا مقصد عازمین حج کی بہتر رہنمائی کرنا ہے۔
سعودی عرب: بحری راستے سے عازمین حج کا پہلا گروپ جدہ پہنچ گیا
حرمین میں دینی امور کے سربراہ شیخ السدیس نے آپریشنل منصوبے کا افتتاح کردیا ہے۔ اُن کا کہنا تھا کہ مملکت کی قیادت نے ضیوف الرحمان کی سہولت اور آرام کے لیے تمام وسائل بروئے کار لائے ہیں تاکہ دنیا بھر سے آنے والے عازمین یہاں سے اعتدال پسندی اور انسانیت کا پیغام لے کر جائیں۔
