لاہور : وفاقی وزیر ہوا بازی غلام سرور خان نے کہا ہے کہ عازمین حج کو ہر ممکن سہولیات فراہم کی جائیں، انہوں نے ایئر پورٹ پر ہونے والے فائرنگ کے واقعے کا نوٹس لے کر رپورٹ طلب کرلی۔
تفصیلات کے مطابق وفاقی وزیر ہوا بازی غلام سرور خان نے علامہ اقبال انٹرنیشنل ائیرپورٹ لاہور کا دورہ کیا، انہوں نے ایئر پورٹ کے احاطے میں ہونے والی فائرنگ کے واقعے کا نوٹس لیتے ہوئے سی اے اے اور اے ایس ایف کو فائرنگ کے واقعے کی تفصیلی رپورٹ جمع کرانے کی ہدایت کی۔
وفاقی وزیر نے فائرنگ حادثے کے جائے وقوعہ کا دورہ بھی کیا، اس موقع پر ائیرپورٹ منیجر اور چیف آپریٹنگ آفیسر علامہ اقبال انٹرنیشنل ائیرپورٹ نذیر احمد خان نے ائیرپورٹ کے انتظامی امور پر وفاقی وزیر کو بریفنگ دی۔
اس کے علاوہ اے ایس ایف کے ڈائریکٹر سیکورٹی کرنل علی ٹیپو نے بھی ائیرپورٹ کے سیکورٹی امور کے بارے میں وفاقی وزیر کو آگاہ کیا اور فائرنگ کے واقعے سے متعلق تفصیلات بتائیں۔
اپنے دورے کے دوران غلام سرور خان نے حج ایریا پر لگائے گئے چیک ان، امیگریشن اور کسٹم کاؤنٹرز پر عازمین حج کو دی جانے والی سہولیات کا جائزہ لیا، وفاقی وزیر نے سی اے اے اور دیگر متعلقہ اداروں کو مسافروں خاص طور پرعازمین حج کو ہر ممکن سہولیات فراہم کرنے کی سختی سے تاکید کی۔
