ریاض : فریضہ حج ادا کرنے والے 20 لاکھ عازمین حج رکن اعظم ’وقوف عرفہ‘ کی ادائیگی کے لیے میدان عرفات میں جمع ہونا شروع ہوگئے۔
تفصیلات کے مطابق حج مناسک کی ادائیگی کے لیے سعودی عرب جانے والے لاکھوں حجاج کرام رکن اعظم وقوف عرفہ کی ادائیگی کے لیے میدان عرفات میں پہنچنا شروع ہوگئے۔
میدان عرفات میں وقوف عرفہ کی ادائیگی کے دوران مسجد نبوی کے امام شیخ حسن بن عبدالعزیز آل شیخ مسجد نمرہ میں خطبہ حج دیں گے جس کے بعد نماز ظہرین (ظہر و عصر) ایک ساتھ ادا کی جائے گی۔
20 لاکھ کے قریب عازمین حج غروب آفتاب ہوتے ہی مزدلفہ کی جانب روانہ ہوجائیں جہاں وہ نماز مغربین (مغرب اور عشاء) ایک ساتھ قصر ادا کریں، عازمین کرام آج (9 ذوالحج) کو کھلے آسمان تلے مزدلفہ میں ہی قیام کریں گے اور رمی جمرات کے لیے کنکریاں بھی جمع کریں گے۔
حجاج کرام 10 ذوالحج کو طلوع آفتاب کے بعد دوبارہ منیٰ کی جانب روانہ ہوں گے جہاں وہ سب سے بڑے شیطان کو کنکریاں ماریں گے اور رمی جمرات کے بعد حجاج کرام قربانی کریں۔
حج مناسک کی ادائیگی کے لیے سعودی جانے والے عازمین کرام قربانی کے بعد مکۃالمکرمہ جاکر مسجد الحرام میں طواف زیارت کریں گے اور صفا و مروہ کے درمیان سعی کی سعادت حاصل کریں گے جس کے بعد واپس منیٰ آجائیں گے۔
واضح رہے کہ رواں برس فریضہ حج کی ادائیگی کے لیے دنیا بھر سے 20 لاکھ مسلمان سعودی عرب پہنچے ہیں، عازمین کرام میں 1 لاکھ 84 ہزار افراد پاکستانی ہیں۔
خیال رہے کہ سعودی حکام نے حجاج کرام کی سہولت اور کے لیے ایک ہیلپ لائن 8004304444 متعارف کروائی گئی ہے جس پر کال کرکے شکایت یا معلومات درج کروائی جاسکتی ہے۔
سعودیہ جانے والے سافٹ ویئرز ماہرین میں دو پاکستانی شہری بھی شامل ہیں جنہوں نے دو ایشیائی طالب علموں کے ساتھ مل کر ایک ایسی ایپلی کیشن بنائی ہے جو دوران حج انسانوں کے سمندر میں لاپتہ ہونے والے عازمین حج کا پتہ لگائے گی۔
