سعودی عرب میں حج سیزن 2024 کی مناسبت سے سعودی محکمہ امن عامہ نے 4 مئی 2024 سے حج سیزن کے حوالے سے ضوابط پر عملدرآمد کے آغاز کا اعلان کردیا ہے۔
سعودی خبر رساں ادارے ایس پی اے کی رپورٹ کے مطابق محکمہ امن عامہ کا کہنا ہے کہ مکہ مکرمہ میں داخلے کیلیے انٹری پرمٹ لازمی دکھانا ہوگا۔ ’نئے ضوابط کا مقصد حج کے عمل کو بہتر اور عازمین حج کے تحفظ کو یقینی بنانا ہے‘۔
سعودی محکمہ امن عامہ کے مطابق ’حج 2024 کے قواعد و ضوابط پر عمل درآمد کے لیے ایسے کسی بھی شخص کو جس کے پاس متعلقہ ادارے کی جانب سے حج مقامات پر کام کے لیے داخلے کا اجازت نامہ نہیں ہوگا انہیں اور بغیر پرمٹ مکہ جانے والی گاڑیوں کو واپس روانہ کردیا جائے گا‘۔
’ایسے افراد جن کے پاس مکہ سے جاری کردہ اقامہ، عمرہ پرمٹ یا حج پرمٹ ہوگا تو وہ اس سے مستثنی ہوں گے‘۔
سعودی عرب: کن ویزوں پر آنے والے حج نہیں کرسکیں گے؟
واضح رہے کہ سعودی قوانین کے مطابق حج سیزن کے دوران کسی سعودی شہری یا مقیم غیر ملکی کو بغیر اجازت نامے کے مکہ مکرمہ اور مشاعر مقدسہ جانے کی اجازت نہیں دی جاتی، اس کے لئے اجازت نامہ لازمی شرط ہے۔
