کراچی :عدالت نے میمن گوٹھ تھانےمیں درج مقدمے میں حلیم عادل شیخ کی ضمانت منظور کرلی ، دس ہزار روپے کے عوض ضمانت منظور کی گئی۔
تفصیلات کے مطابق ڈسٹرکٹ کورٹ ملیر میں تجاوزات آپریشن میں مداخلت اور کار سرکار میں مداخلت کیس کی سماعت ہوئی ، اپوزیشن لیڈر حلیم عادل شیخ کو پیش کیا گیا، رمضان ، محمود ، غلام مصطفی ، عبدالحسیب سمیت دیگرملزمان کو بھی پیش کیا۔
دوران سماعت پولیس کی جانب سے ریمانڈ کی استدعا کی گئی ، وکیل اپوزیشن لیڈر نے کہا مقدمات حکومت کی کرپشن سامنے لانے پر بنائے گئے ہیں ، اپوزیشن لیڈر ہیں ،کوئی کرمنل ریکارڈ نہیں ،ضمانت دی جائے۔
جس پر عدالت نے میمن گوٹھ تھانےمیں درج مقدمے میں حلیم عادل شیخ کی ضمانت منظور کرلی، دس ہزار روپے کے عوض ضمانت منظور کی گئی۔
دوسری جانب کارسرکارمیں مداخلت،ہنگامہ آرائی اور املاک کو نقصان پہنچانے کے الزام میں حلیم عادل شیخ اور دیگر ملزمان کو جوڈیشل مجسٹریٹ ملیر کے روبرو پیش کیا گیا۔
عدالت نے ملزمان کا 2روز ہ جسمانی ریمانڈ منظور کرلیا ، ملزمان کے خلاف گڈاپ تھانے میں مقدمات درج ہیں۔
اس سے قبل پولیس کی جانب سے قائد حزب اختلاف سندھ حلیم عادل شیخ اور ان کے ساتھیوں کو انسداد دہشت گردی میں پیش کیا گیا ، انسداد دہشت گردی کی عدالت نے اپوزیشن لیڈر حلیم عادل شیخ کا2روزہ جسمانی ریمانڈمنظور کرتے ہوئے جمعے کوپیش کرنے کا حکم دیا تھا۔
خیال رہے حلیم عادل شیخ پر ضمنی الیکشن میں ہنگامہ آرائی ،فائرنگ کے الزامات ہیں ، انھیں گزشتہ روز پولیس نے گرفتار کیا تھا جبکہ حلیم عادل اور ساتھیوں کار سرکار میں مداخلت کی دفعات کےتحت مقدمہ درج ہے۔
