کینیڈا : کینیڈا کے شہرہملٹن میں انتہا پسند نے مسلمان ماں بیٹی کو کچلنے نے کوشش کی تاہم دونوں بال بال بچ گئیں۔
تفصیلات کے مطابق کینیڈا میں اسلاموفوبیا کا ایک اور واقعہ پیش آیا ، جہاں شہرہملٹن میں حملہ آور نے پارکنگ میں مسلمان ماں بیٹی پر گاڑی چڑھانے کی کوشش کی تاہم دونوں بال بال بچ گئیں۔
کینیڈین میڈیا کے مطابق دونوں نے بھاگ کر قریب جھاڑیوں کےپیچھے چھپ گئیں ، جس کے بعد مسلح حملہ آور نے خواتین کا پیچھا کیا،انہیں قتل کی دھمکیاں دیں اورنفرت آمیز جملے کہے۔
کینیڈین پولیس نے حملہ آور کو گرفتار کرکے واقعے کی تحقیقات شروع کردیں۔
دوسری جانب کینیڈا میں اسلاموفوبیا کے بڑھتے واقعات پر بائیس جولائی کو حکومت نے ہنگامی اجلاس طلب کر رکھا ہے۔
یاد رہے گذشتہ ماہ پاکستانی نژاد محمد کاشف کینیڈا کے شہرساسکاٹون میں حملے کانشانہ بنے تھے ، محمد کاشف کو 2سفید فام نسل پرستوں نے چاقو مار کر زخمی کیا، اور ان کی داڑھی مونڈھ دی تھی۔
اس سے قبل سینٹ البرٹ میں نامعلوم افراد کی جانب سے دو مسلمان خواتین کو راہ چلتے دھکے دے کر ان کے سروں سے حجاب کھینچا گیا، اچانک حملے کے باعث وہ خواتین زمین پر گر پڑیں تھیں۔
واضح رہے 6 جون کو کینیڈا کے شہر لندن انٹاریو میں دہشت گردی کے واقعے میں ایک خاندان کے چار افراد 46 سالہ فزیوتھراپسٹ سلمان افضل، ان کی اہلیہ اور پی ایچ ڈی کی طالبہ 44 سالہ مدیحہ سلمان، نویں جماعت کی طالبہ 15 سالہ یمنیٰ سلمان اور اُن کی 74 سالہ ضعیف دادی کو ٹرک کے نیچے روند ڈالا تھا۔
کینیڈا کے وزیراعظم جسٹن ٹروڈو نے اس حملے کی مذمت کرتے ہوئے اسے دہشت گردی قرار دیا تھا۔ 20 سالہ ملزم یتھینیل ویلٹمین پر قتل کے چار اور اقدامِ قتل کا ایک الزام عائد کیا گیا تھا۔
