اسلام آباد : پی ٹی آئی رہنما حماد اظہر نے انتخابات سے دستبرداری کا اعلان کردیا اور کاغذات نامزدگی مسترد ہونے کے خلاف اپیل واپس لے لی۔

تفصیلات کے مطابق سپریم کورٹ میں پی ٹی آئی رہنما حماد اظہر کے کاغذات نامزدگی کیس کی سماعت ہوئی ، حماد اظہرنے سپریم کورٹ سے اپیل واپس لے لی اور انتخابات سے دستبرداری کا اعلان کردیا۔

معاون وکیل نے عدالت کو بتایا کہ حماد اظہر اپیل کی پیروی نہیں کرنا چاہتے، جس پر جسٹس منصورعلی شاہ نے کہا کہ ہائی کورٹ نے اپنے فیصلے میں 62ون ایف کاحوالہ کیوں دیا ؟ فیصلہ واضح ہے آرٹیکل 62 ون ایف کااطلاق ازخود نہیں ہوتا۔

وکیل آفتاب یاسر کا کہنا تھا کہ اشتہاری کی اہلیت کے حوالے سےآپ کافیصلہ بھی آ چکا ہے، تو جسٹس منصورعلی شاہ نے ریمارکس دیئے اپیل واپس لینےکی وجہ سے حماد اظہرکوفیصلے کافائدہ نہیں ہوگا۔

جسٹس جمال مندوخیل نے کہا کہ لگتا ہے حماد اظہر سرینڈرنہیں کرنا چاہتے، جس پر معاون وکیل آفتاب عالم یاسر کا کہنا تھا کہ سرینڈرکرنے میں کوئی حرج نہیں۔

خیال رہے تحریک انصاف کے رہنما حماد اظہر این اے 129 سے آزاد امیدوار تھے۔