لاہور: مسلم لیگ ن کے رہنما اور سابق وزیر اعلیٰ شہباز شریف کے صاحبزادے حمزہ شہباز نے کلثوم نواز کو خراج عقیدت پیش کرتے ہوئے کہا کہ انہوں نے ڈکٹیٹر کے دور میں جمہوریت کا علم بلند کیا۔
تفصیلات کے مطابق جاتی امرا میں مسلم لیگ ن کے رہنما حمزہ شہباز نے میڈیا سے گفتگو کرتے ہوئے کہا کہ بیگم کلثوم نواز ایک بہادر خاتون تھیں۔
انہوں نے کہا کہ کلثوم نواز نے ڈکٹیٹر کے دور میں جمہوریت کا علم بلند کیا، کلثوم نواز 14 ماہ تک کینسر جیسے موذی مرض سے لڑیں۔
حمزہ شہباز نے میاں محمد بخش کا کلام سنا کر کلثوم نواز کو خراج عقیدت بھی پیش کیا۔
خیال رہے کہ سابق خاتون اول بیگم کلثوم نواز طویل علالت کے بعد گزشتہ روز لندن میں انتقال کر گئی تھیں۔
اس موقع پر نواز شریف، ان کی صاحبزادی مریم نواز اور داماد کیپٹن صفدر کو پیرول پر رہا کیا گیا تھا جس کے بعد وہ جاتی امرا پہنچ گئے ہیں۔
دوسری جانب نواز شریف کے بھائی اور سابق وزیر اعلیٰ پنجاب شہباز شریف اپنی بھابھی کی میت لینے کے لیے لندن روانہ ہوچکے ہیں۔
وہ میت لے کر جمعہ کو وطن واپس آئیں گے جس کے بعد مرحومہ کلثوم نواز کو جاتی امرا میں سپرد خاک کیا جائے گا۔
