اے آر وائی نیٹ ورک کو 23 ویں سالگرہ مبارک ہو، کامیابی و کامرانی کا ایک اور سال مکمل ہو گیا، 23 سال سے جاری و ساری سفر کا ہر سال بے مثال رہا ہے۔
اے آر وائی نیٹ ورک تئیس سال کا ہو گیا ہے، تئیس سال سے جاری سفر کا ہر سال بے مثال رہا ہے، کون جانتا تھا کہ لندن کے ایک دفتر سے شروع ہونے والا اے آر وائی نیٹ ورک پاکستان کی شاخت بنے گا اور میڈیا انڈسٹری پر چھا جائے گا۔
اللہ کی رحمت، سچی لگن، ان تھک محنت اور حاجی عبدالرزاق یعقوب مرحوم، اے آر وائی نیٹ ورک کے چیئرمین حاجی اقبال، حاجی جان محمد، حاجی عبدالرؤف، اور اے آر وائی نیٹ ورک کے صدر اور سی ای او سلمان اقبال کی مثالی لیڈر شپ نے ناممکن کو ممکن کر دکھایا۔
اے آر وائی نیٹ ورک میڈیا انڈسٹری میں پاکستان کی سب سے بڑی شناخت بن گیا ہے، آج اے آر وائی نیٹ ورک کے بینر تلے چلنے والا ہر چینل پاکستانیوں کے دل کی آواز ہے، خبریں ہوں یا تفریحی پروگرام، حالات حاضرہ پر گفتگو ہو یا اسلامی آگہی ہو، اے آر وائی نیٹ ورک نے ہمیشہ اور ہر طرح کے حالات میں پیشہ ورانہ صحافتی اقدار کو مقدم رکھا۔
سچ کے سفر میں سختیوں کا سامنا رہا، بندشیں رہیں، دھمکیاں ملیں، حملے بھی ہوئے، لیکن ڈرے نہیں جھکے نہیں، سچ ہی فلسفہ اور پاکستان ہماری سوچ کا محور رہا، محبت، بھروسے اور اعتماد کا یہ رشتہ قائم دائم رہے گا۔
دیکھتے ہی دیکھتے اے آر وائی ایک چینل سے چینلز کی فیملی بن گیا، اے آر وائی ڈیجیٹل پاکستان کا نمبر ون سب کا محبوب انٹرٹیمنٹ چینل ہے، اے آر وائی نیوز پاکستان میں سب سے زیادہ دیکھا جانے والا سب سے معتبر نیوز چینل بن چکا ہے، پاکستان کا پہلا ایچ ڈی اسپورٹس چینل اے اسپورٹس بھی اے آر وائی فیملی کا حصہ بنا اور آتے ہی ناظرین کے دلوں میں گھر کر گیا۔
اے آر وائی کیو ٹی وی پاکستان کا پہلا سب سے بڑا مذہبی چینل ہے جس کا طرہ امتیاز مذہبی ہم آہنگی کا فروغ اور دین کا فہم عام کرنا ہے۔ اے آر وائی زندگی ہر گھر میں زندگی کے رنگ بکھیر رہا ہے اور اے آر وائی میوزک جدید میوزک میں پاکستان کو عالمی افق پر متعارف کرا رہا ہے۔
نکلوڈین بچوں کا عالمی نمبر ون چینل بھی اے آر وائی فیملی کا حصہ ہے، اللہ کا خاص کرم ہے کہ آج اے آر وائی نیٹ ورک کے چینلز کی نشریات پوری دنیا میں دیکھی اور سراہی جاتی ہیں۔ یہ سفر تئیس سال کا ہو چکا ہے مگر یہ تو صرف ابتدا ہے، کارواں چل رہا ہے، ترقی کا سفر جاری رہے گا۔
