کراچی : دنیا بھرکی طرح پاکستان میں بھی نئے سال2019کی آمد پر لوگوں نے خوشی کا اظہار کیا ہے، پاکستان میں رات کے بارہ بجتے ہی منچلوں نے خوب ہلہ گلہ کیا اور ہوائی فائرنگ کی۔
سال2018 کا اختتام ہوگیا ہے اور نیا سال2019پوری آب و تاب کے ساتھ دہلیز پر کھڑا ہے، قوموں کے لیے یہ دن گزشتہ سال کا جائزہ لینا ہی نہیں بلکہ نئے اہداف کے انتخاب اور ان کے حصول کے لیے منصوبہ بندی کا موقع بھی ہوتا ہے۔
اس موقع پر ملک کے مختلف شہروں میں شاندار آتش بازی کا بھی مظاہرہ کیا گیا، آتش بازی سے آسمان روشن ہوگیا، عوام کی بڑی تعداد نے نئے سال کو خوش آمدید کہا اور ایک دوسرے کو مبارکباد دیتے ہوئے نیک خواہشات کا اظہار بھی کیا۔
اس حوالے سے اے آر وائی نیوز کی جانب سے اہل وطن کو مبارکباد پیش کی گئی ہے۔ اےآر وائی نیوز نے نئے سال کی آمد کے موقع پر اس عزم کا اعادہ کیا کہ اس سال بھی سب سے پہلے اور معتبر خبروں کا سلسلہ جاری رہے گا۔
اے آر وائی نیوز نے اس موقع پر احمد ندیم قاسمی کے اشعار کی صورت میں کی یہ دعا کی کہ
خدا کرے میری ارض پاک پر اترے
وہ فصلِ گل جسے اندیشہء زوال نہ ہو
یہاں جو پھول کھلے وہ کِھلا رہے برسوں
یہاں خزاں کو گزرنے کی بھی مجال نہ ہو
اس کے علاوہ بحریہ ٹاؤن کراچی، لاہور اور اسلام آباد میں سال نو کےجشن کا آغاز شایان شان طریقے سے ہوا، جس میں شاندارآتش بازی
کا مطاہرہ کیا گیا، بحریہ ٹاؤن کے تحت میوزیکل پروگراموں کابھی انعقاد کیا گیا۔
شہری نئے سال کے استقبال کے لیے پرجوش ہیں ،پاکستانی بھی نئے سال کو خوش آمدید کہنے کے لیے اپنے اپنے انداز میں تیاریاں کررہے ہیں ، دوہزار اٹھارہ کے آخری غروب آفتاب کا منظر دیکھنے شہری بڑی تعدادمیں سی ویو پہنچے،
کراچی کے ساحل سی ویو پر اس سال بھی نئے سال کاجشن منایا گیا، سندھ حکومت کی جانب سے سی ویو پر جشن منانے پر پابندی نہ لگانے کی خبر منچلوں کے لئے نئے سال کا سب سے بڑا تحفہ ثابت ہوئی۔
اس کے علاوہ سندھ حکومت کی جانب سے موٹر سائیکل کی ڈبل سواری کی پابندی بھی کچھ دیر بعد ہٹالی گئی، وزیر اعلیٰ سندھ نے پابندی کا نوٹیفکیشن واپس لینے کا حکم دے دیا۔
منچلوں نے قافلوں کی صورت میں سی ویو کا رخ کیا، نوجوانوں نے جم کر نئے سال کا جشن منایا، بھنگڑے ڈالے اور خوب موج مستی اور ہلا گلہ کیا، شہر بھر سے منچلے موٹرسائیکلوں اور گاڑیوں پر سی ویو پہنچے، سی ویو پر شاندار آتش بازی کا مظاہرہ بھی کیا گیا۔
