سابق بھارتی آف اسپنر ہربھجن سنگھ نے کہا ہے کہ بابر اعظم ایک بہترین بیٹر ہیں، ویرات کوہلی کا گراف وقت کے ساتھ اوپر گیا ہے۔
پاکستانی ذرائع ابلاغ سے گفتگو کرتے ہوئے موجودہ تجزیہ کار ہربھجن سنگھ کا کہنا تھا کہ بابر اعظم بہترین بیٹر ہیں آپ ان کا کوہلی سے تقابل نہ کریں لیکن میری نظر میں ویرات کوہلی بابر اعظم سے بہت اوپر پیں آپ ان کے اعداد و شمار دیکھ لیں۔
انھوں نے کہا کہ ویرات کوہلی کا گراف وقت کے ساتھ اوپر گیا ہے اور پاکستانی بیٹر نے ابھی اس طرف سفر شروع کیا ہے انھیں کافی وقت لگے گا۔
انٹرویو کے دوران میزبان نے ان سے سوال کیا کہ آپ کے دور میں ٹنڈولکر نمبر ون بیٹر تھے پھر کوہلی آئے اور ان کی خاصیت یہ ہے کہ وہ جس میچ میں رنز کرتے ہیں ٹیم جیتتی ہے، آپ کے خیال میں دنوں میں سے بڑا پلیئر کون ہے؟
اس پر ہربھجن سنگھ نے کہا کہ یہ سوال نہ پوچھیں، سب ہی یہ سوال پوچھتے ہیں۔ سچن ٹنڈولکر سچن ٹنڈولکر ہیں انھوں نے پورے ملک کو متاثر کیا ہے۔
جو روایت سچن نے چھوڑی وہ ویرات کوہلی نے پکڑی ہے اب سارے ویرات کوہلی بننا چاہتے ہیں۔ بحیثیت کرکٹر دنوں ہی بہترین ہیں اور کرکٹ کے بہترین سفیر ہیں۔ لوگ ان کے جیسا بننے چاہتے ہیں۔
انھوں نے کہا کہ جو نوجوان پلیئر آگے آنا چاہتے ہیں اپنی قابلیت پر یقین رکھیں کہ اچھے دن ضرور آئیں گے وہ محنت جاری رکھیں۔
