بھارت کے سابق آف اسپنر ہربھجن سنگھ نے غیر معیاری پچز بنانے پر اپنے ہی کرکٹ بورڈ کو آڑے ہاتھوں لیتے ہوئے سخت تنقید کی ہے۔
کپتان، کوچز کا نام لیے بغیر ہربھجن نے پچ کی تیاری کے عمل پر تنقید کی ہے، انھوں نے کہا کہ بھارتی کپتان اور کوچز میچ جیتنے کے لیے اس طرح کی پچز بنانے کے حق میں ہوتے ہیں کہ ٹیسٹ میچ 3 دن میں ختم ہوجائے تاہم یہ بیٹرز کے لیے بہت نقصان دہ ہوتا ہے۔
ہربھجن سنگھ نے بھارتی ٹیم مینجمنٹ پر الزام لگایا کہ وہ اسپن فرینڈلی پچز بنواتے ہیں تاکہ میچ ڈھائی دن میں ہی ختم ہوجائے جس سے بالواسطہ طور پر بھارتی بیٹرز کے اعتماد کو ٹھیس پہنچتی ہے۔
سابق بھارتی کرکٹر نے کہا کہ اس طرح کی پچز میں مسائل ہوتے ہیں، ہم نے اس طرح کی پچز پر کھیلنا شروع کردیا ہے جو بہت زیادہ ٹرن ہوتی ہیں۔
انھوں نے کہا کہ ہم ٹیسٹ میچ جیتنا چاہتے ہیں اور جیتتے بھی ہیں تاہم ہم صرف ڈھائی دن میں ہی میچ جیتنا چاہتے ہیں۔
ہربھجن سنگھ نے کہا کہ اگر ہم اس طرح کی پچز بنائیں جو تیسرے یا چوتھے دن سے ٹرن کرنا شروع کرے تو بھی ہم میچز جیت جائیں گے مگر اس سے کم از کم یہ ہوگا کہ ہمارے بیٹرز کو بیٹنگ کرنے کا موقع تو میسر آئےگا۔
خیال رہے کہ پچھلے پانچ چھ سالوں سے بھارت میں کوئی بی ٹیسٹ میچ کھیلا جائے تو پچ کے حوالے سے خبریں ضرور میڈیا کی زینت بنتی ہیں کیوں کہ بھارت اپنی میزبانی کا فائدہ اٹھاتے ہوئے ہمیشہ اسپن فرینڈلی پچز بناتا ہے۔
بھارت کے بیٹر چوں کے اپنی پچز پر کھیلنے کے عادی ہوتے ہیں اور اسپنرز کو بھی اچھا کھیلتے ہیں جس کی وجہ سے انھیں مشکلات کا سامنا نہیں کرنا پڑتا جبکہ غیرملکی ٹیمیں بھارت کے اسپن جال میں پھنس کر اکثر و بیشتر میچز ہار جاتی ہیں۔
