بھارتی ٹیم کے آل راؤنڈر ہاردک پانڈیا نے آئی پی ایل میں نئی تاریخ رقم کردی۔
آئی پی ایل 2025 میں گزشتہ روز ممبئی انڈینز اور لکھنؤ سپر جائنٹس کا میچ کھیلا گیا جس میں لکھنؤ کی ٹیم نے کامیابی حاصل کی اور ممبئی انڈینز کو 12 رنز سے شکست ہوئی۔
ممبئی انڈینز کے خلاف لکھنو سپر جائنٹس نے مقررہ 20 اوورز میں 8 وکٹوں کے نقصان پر 203 رنز اسکور کیے۔
204 رنز کے ہدف کے جواب میں ممبئی انڈینز کی ٹیم مقررہ 20 اوورز میں 5 وکٹوں کے نقصان پر 191 رنز بناسکی۔
تاہم ہاردک پانڈیا نے میچ میں وہ کارنامہ انجام دیا جو آئی پی ایل کی تاریخ میں آج تک کوئی کپتان نہیں کرسکا۔
ہاردک پانڈیا نے ممبئی انڈینز کی جانب سے شاندار بولنگ کرتے ہوئے 4 اوورز میں 36 رنز دے کر پانچ کھلاڑیوں کو پویلین کی راہ دکھائی۔
آل راؤنڈر آئی پی ایل میں پانچ وکٹیں حاصل کرنے والے پہلے کپتان بن گئے، انہوں نے ٹی 20 کرکٹ میں پہلی بار پانچ وکٹیں حاصل کیں۔
واضح رہے کہ اس سے قبل آئی پی ایل کی تاریخ میں کسی بھی کپتان کی بہترین بولنگ فیگرز 16 رنز دے کر 4 وکٹیں تھیں جو 2009 میں رائل چیلنجرز بنگلور کے کپتان انیل کمبلے نے حاصل کی تھیں۔
