پاک بھارت میچ میں جہاں ہاردک پانڈیا نے شاندار کارکردگی دکھائی وہیں ان کے ہاتھ میں موجود گھڑی نے بھی لوگوں کی توجہ حاصل کرلی۔
دبئی میں کھیلے گئے میچ میں بھارت نے پاکستان کو 6 وکٹوں سے شکست دی اور ویرات کوہلی کی سنچری کی بدولت 242 رنز کا ہدف باآسانی حاصل کرلیا۔
آل راؤنڈر ہاردک پانڈیا نے میچ میں دو اہم وکٹیں حاصل کیں۔
بھارتی میڈیا رپورٹ کے مطابق ہاردک پانڈیا مہنگی گھڑی پہننے کا شوق رکھتے ہیں اور میچ میں بھی انہوں نے سوئس کمپنی رچرڈ ملے کی مہنگی گھڑی پہنی تھی۔
ہاردک پانڈیا کی پہنی گئی گھڑی نایاب ہے جس کے صرف 50 سیٹ ہی بنائے گئے ہیں۔ یہ گھڑی خوبصورتی، پائیداری اور انجینئرنگ کا کمال ہے جسےکرسٹینا رونالڈو، رافیل نڈال اور ویرات کوہلی جیسے اسٹار کھلاڑی بھی پہنتے ہیں۔
ہندوستان ٹائمز کے مطابق اس گھڑی کی قیمت تقریباً 3 لاکھ ڈالر سے زائد ہے جس کی رقم پاکستانی روپے میں 8 کروڑ 38 لاکھ روپے سے زائد بنتی ہے۔
خیال رہے کہ رچرڈ ملے ایک سوئس واچ برانڈ ہے جوکہ مہنگی ترین اور خاص ڈیزائنز والی گھڑیوں کے لیے دنیا بھر میں مشہور ہے۔
گھڑی میں نیلے رنگ کے لچکدار بینڈ کے ساتھ سفید کوارٹج کیس، ایک فکسڈ سفید کوارٹز بیزل، اور سلور ٹون ہینڈز اور انڈیکس آور مارکر کے ساتھ ایک سیاہ ڈائل شامل ہے۔
