بھارتی آل راؤنڈر ہاردک پانڈیا کو روہت شرما کے جانے کے بعد ٹی ٹوئنٹی کرکٹ ٹیم کے آئندہ کپتان کے طور پر دیکھا جارہا ہے۔
برج ٹاؤن میں ٹی ٹوئنٹی عالمی کپ کے فائنل میں بھارت کی سات رنز سے جیت کے ساتھ ہی روہت شرما ٹی ٹوئنٹی کرکٹ سے ریٹائر ہوچکے ہیں، ایسے میں ہاردک پانڈیا سے 2026 کے ٹی ٹوئینٹی ورلڈ کپ کے سلسلے میں روہت کا ممکنہ متبادل ہونے کے بارے میں سوال کیا گیا۔
تاہم ممبئی انڈینز کے کپتان نے اس بات پر چپ رہنے کو ترجیح دی اور صاف جواب دینے سے گریز کیا بلکہ انھو نے بھارتی کپتان روہت اور کوہلی کے بارے میں بات کرنا شروع کردی۔
ہاردک پانڈیا نے کہا کہ 2026 کے لیے ابھی کافی وقت ہے، اس وقت میں روہت اور ویرات دونوں کے لیے بہت خوش ہوں، بھارتی کرکٹ کے دو بڑے لیجنڈ اس کے پوری طرح سے مستحق تھے۔
آل راؤنڈر نے کہا کہ دونوں کے ساتھ اتنے سالوں سے کھیلنا بہت شاندار رہا، ہم سب کو یہ یاد آئے گا لیکن اس سے اچھا لمحہ کیا ہوگا کہ ہم دونوں کو اس بہترین انداز میں الوداع کہیں۔
ٹی ٹوئنٹی ورلڈ کپ کے بعد بھارت زمبابوے میں 5 جولائی سے شروع ہونے والی تین میچوں کی ٹی ٹوئنٹی سیریز میں حصہ لے گا۔
لیفٹ ہینڈ بیٹر شیوم ڈوبے زمبابوے کے اس دورے میں شرکت کرنے والے موجودہ ورلڈ کپ اسکواڈ کے واحد رکن ہوں گے جبکہ شبمن گل بھارتی ٹیم کی قیادت کریں گے۔
