آئی پی ایل میں پے درپے شکستوں نے ممبئی انڈینز کے کپتان ہاردک پانڈیا کو تنہا کردیا، وہ ڈگ آؤٹ میں اکیلے بیٹھے نظر آئے۔
وانکھیڈے اسٹیڈیم میں پیر کی رات ہاردک پانڈیا کافی مشکل میں نظر آئے، گزشتہ پندرہ دنوں کے دوران احمد آباد اور حیدرآباد میں شائقین کے غصے کا سامنا کرنے کے بعد ویسے بھی انھیں ممبئی انڈینز کے ہوم گراؤنڈ میں کراؤڈ سے کسی بھی قسم کے استقبال کی توقع نہیں تھی۔
ممبئی کو آئی پی ایل 2024 میں مسلسل تیسری شکست کا سامنا کرنا پڑا، راجھستان رائلز کے خلاف میچ میں ناکامی کے بعد پریشان پانڈیا ممبئی کے ڈگ آؤٹ کی طرف چل پڑے اور وہاں جا کر اکیلے بیٹھ گئے۔
جس چیز نے لوگوں کی توجہ مبذول کروائی وہ یہ تھی کہ ممبئی انڈینز کے باقی کھلاڑیوں نے گراؤنڈ سے باہر جانے کا انتخاب کیا اور کوئی بھی پلیئر ہاردک کے ساتھ نہیں آیا۔
میچ کے دوران بھی ہاردک پر آوازیں کسی جاتی رہیں کیوں کہ ممبئی نے رائلز کے خلاف بہت ہی بُری بلے بازی کا مظاہرہ کیا تھا جس کی وجہ سے شائقین ناراض تھے۔
ہاردک اور تلک ورما نے اس میچ میں نصف سنچری شراکت قائم کی تھی تاہم یہ کوشش کافی نہیں تھی کیونکہ ممبئی کی پوری ٹیم 20 اوور میں نو وکٹوں پر صرف 125 رنز بنا سکی تھی۔
ہاردک نے ہوم گراؤنڈ پر راجستھان کے خلاف ممبئی کی شکست کا ذمہ دار خود کو ٹھہرایا تھا کیونکہ کپتان کا خیال تھا کہ ان کے آؤٹ ہونے سے مہمانوں کو میچ میں واپسی کا موقع ملا۔
