پاکستان کرکٹ ٹیم کے آل راؤنڈر حارث سہیل نے ریٹائرمنٹ سے متعلق افواہوں کی سختی سے تردید کرتے ہوئے انہیں بے بنیاد قرار دے دیا۔
حارث سہیل نے سوشل میڈیا پر جھوٹی خبروں پر مایوسی کا اظہار کرتے ہوئے واضح کیا کہ ان کا ریٹائرمنٹ کا کوئی ارادہ نہیں ہے۔
انہوں نے کہا کہ ریٹائرمنٹ کا کوئی فیصلہ نہیں کیا اور نہ ہی میرا ایسا کوئی ارادہ ہے، میری پوری توجہ اپنے پسندیدہ کھیل پر جاری رکھنے پر مرکوز ہے۔
پی سی بی نے بھی تصدیق کی ہے کہ آل راؤنڈر کی ریٹائرمنٹ کے حوالے سے کوئی باضابطہ رابطہ نہیں ہوا۔
رپورٹ کے مطابق پی سی بی کے عہدیدار نے حارث سہیل سے رابطہ کیا جس کے بعد یہ واضح ہوا کہ انہوں نے ان افواہوں کی تردید کردی ہے۔
واضح رہے کہ حارث سہیل نے 2013 میں قومی ٹیم میں ڈیبیو کیا تھا، وہ اب تک 16 ٹیسٹ، 45 ون ڈے اور 14 ٹی 20 انٹرنیشنل میں ملکی نمائندگی کرچکے ہیں۔
انہوں نے تینوں فارمیٹ میں چار سنچریوں اور 17 نصف سنچریوں کی مدد سے 2806 رنز بنائے ہیں۔
آل راؤنڈر نے گرین شرٹس کے لیے آخری میچ گزشتہ سال جنوری میں کھیلا تھا جب انہیں چیف سلیکٹر شاہد آفریدی نے نیوزی لینڈ کیخلاف تین میچوں کی ہوم سیریز کے لیے منتخب کیا تھا۔
