کوئٹہ: بلوچستان کے علاقے ہرنائی میں سیکیورٹی فورسز کی گاڑی کے قریب دھماکے کے باعث 6 سیکیورٹی اہلکار شہید اور 2 زخمی ہوگئے۔
تفصیلات کے مطابق بلوچستان میں کوئٹہ کے نزدیک واقع علاقے ضلع ہرنائی میں سیکیورٹی فورسز پر حملہ ہوا ہے جس کے نتیجے میں 6 اہلکار شہید ہوگئے ہیں۔
تحصیلدار نے بتایا کہ حملے میں 2 اہلکار زخمی بھی ہیں، لاشوں اور زخمیوں کو سول اسپتال کھوسٹ منتقل کردیا گیا ہے۔
خیال رہے کہ یوم آزادی کے موقع پر بلوچستان بھر میں فورسز پر حملوں کا خدشہ ہے جس کے پیش نظر سیکیورٹی پہلے ہی سخت ہے تاہم پھر بھی حملہ آور دوبار کامیاب ہوگئے۔
یاد رہے کہ دو روز قبل بھی کوئٹہ کے علاقے پشین اسٹاپ پر سیکیورٹی فورسز کے ٹرک پرحملے کے نتیجے میں 8 سیکیورٹی اہلکار اور 7 شہریوں سمیت 15 افراد شہید ہوگئے تھے۔
یہ پڑھیں: کوئٹہ میں خودکش دھماکا، 8 سیکیورٹی اہلکار اور7 شہری شہید
اطلاعات ہیں کہ واقعے کے بعد سے فورسز نے علاقے کی ناکا بندی کررکھی ہے۔
