امریکی نائب صدر اور ڈیموکریٹک پارٹی کی صدارتی امیدوار کملا ہیرس نے ریپلکن صدارتی امیدوار ڈونلڈ ٹرمپ کو تنقید کا جواب دے دیا۔

بین الاقوامی خبر رساں ادارے کی رپورٹ کے مطابق سابق امریکی صدر ٹرمپ کو تنقید کا نشانہ بناتے ہوئے کملا ہیرس کا کہنا تھا کہ 5 نومبر کو ہونے والے صدارتی انتخابات میں ان کا مقابلہ بزدل امیدوار سے ہے جس کی سیاست کا محور مخالفین کو نیچا دکھانا ہے۔

کملا ہیرس نے کہا کہ گزشتہ کچھ سالوں سے غلط روایت چل پڑی ہے کہ کسی لیڈر کی طاقت اور اہلیت کا اندازا اس بات سے لگایا جائے گا کہ اس نے کسے گرایا ہے جبکہ ہمیں پتا ہے کہ پرکھنے کا اصل معیار یہ نہیں ہے۔

اُن کا کہنا تھا کہ ایک اچھے رہنما کو پرکھنے کا معیار یہ نہیں کہ اس نے کس کو گرایا یا نیچا دکھایا بلکہ اصل معیار یہ کہ آپ کے رہنما یا لیڈر نے کسے اٹھایا۔

ٹرمپ نے کملا ہیرس کو بنیاد پرست قرار دے دیا

کملا ہیرس نے براہ راست ڈونلڈ ٹرمپ کا نام لینے سے گریز کرتے ہوئے کہا کہ کوئی بھی شخص جو دوسروں کو نیچا دکھانے یا گرانے کی کوشش میں مصروف رہتا ہے وہ بزدل ہوتا ہے کیونکہ اس کے پاس اس کے سوا کوئی چارہ نہیں ہوتا۔