لاہور: ترجمان پنجاب حکومت حسان خاور کا کہنا ہے کہ اسموگ میں کمی کے لیے اقدامات کر رہے ہیں، کوڑے کو آگ لگانے والوں کے خلاف بھی جرمانے ہو رہے ہیں۔

تفصیلات کے مطابق ترجمان پنجاب حکومت حسان خاور کا کہنا ہے کہ ہماری صنعتیں اور اینٹوں کے بھٹے آلودگی پیدا کرتے ہیں، پنجاب بھر میں کالا دھواں چھوڑنے والے بھٹوں کو زگ زیگ ٹیکنالوجی پر لا رہے ہیں۔

حسان خاور کا کہنا تھا کہ اب تک 250 بھٹوں کو جرمانہ عائد کیا جا چکا ہے۔

انہوں نے کہا کہ آلودگی کا تیسرا بڑا مسئلہ ٹریفک سے جڑا ہے، ٹریفک کی روانی کے لیے فلائی اوور اور انڈر پاسز بنا رہے ہیں۔ شہریوں سے درخواست ہے کہ یورو 5 پیٹرول استعمال کیا جائے۔

حسان خاور کا کہنا تھا کہ ہم باغات، سبزہ اور جنگلات لگا کر مستقل بنیادوں پر مسئلہ حل کریں گے۔

انہوں نے کہا کہ صنعتیں لو کوالٹی کا ایندھن چلاتی ہیں جس سے ہوا میں گندگی پھیلتی ہے، کوڑے کو آگ لگانے والوں کے خلاف بھی جرمانے ہو رہے ہیں۔