لاہور: پشاور زلمی کے فاسٹ بولر حسن علی اور اسپنر یاسر شاہ کو نامناسب رویے پر ٹیم مینجمنٹ نے سخت سرزنش کردی۔
تفصیلات کے مطابق چند روز قبل دونوں بولرز کی ایک ویڈیو سوشل میڈیا پر وائرل ہوئی تھی جس میں دونوں کھلاڑی ٹریننگ سیشن کے دوران عجیب و غریب حرکات کرتے دکھائی دے رہے تھے۔
ٹیم کے ڈائریکٹر بولنگ کوچ محمد اکرم نے معاملے پر اظہار برہمی کرتے ہوئے حسن علی اور یاسر شاہ کی سرزنش کی اور آئندہ میدان میں ایسی سرگرمیاں کرنے سے باز رہنے کی ہدایت کی۔
محمد اکرم کا کہنا ہے کہ ویڈیو دیکھنے کے بعد انہوں نےدونوں پلیئرز کو بلایا اور ان کی سرزنش کی جب کہ پلیئرز نے بھی تسلیم کیا کہ جو کچھ ہوا وہ ٹھیک نہیں تھا۔
محمد اکرم نے کہا کہ ایسا رویہ ہمارے معاشرے میں کسی طور پر قابل قبول نہیں اور ہماری روایات اور معاشرتی اقدار کے برخلاف ہے۔
ان کا مزید کہنا تھا کہ اب ہم اس معاملے سے آگے بڑھ کر تمام نظریں اور دھیان صرف اور صرف کھیل پر مرکوز رکھنا چاہتے ہیں۔
