حزب اللہ نے تصدیق کر دی ہے کہ حسن نصراللہ اسرائیلی حملے میں شہید ہو گئے ہیں۔
بی بی سی کی خبر کے مطابق حزب اللہ کے سربراہ حسن نصر اللہ اسرائیلی حملے میں شہید ہو گئے، حزب اللہ نے تصدیق کر دی ہے، انھیں گزشتہ روز کے حملے میں نشانہ بنایا گیا۔
ترجمان حزب اللہ نے ایک بیان میں کہا کہ اسرائیل کے خلاف حزب اللہ کی جنگ جاری رہے گی۔ حزب اللہ کے سینئر رہنما علی کرکی، حسن نصراللہ کی بیٹی زینب بھی اسرائیلی حملے میں شہید ہوئی ہیں، شام لبنان میں القدس فورس کے کمانڈر عباس نیلفوروشن بھی اس حملے میں شہید ہوئے۔
اسرائیل نے گزشتہ روز بیروت میں بنکر بسٹر میزائل حملہ کیا تھا، حسن نصراللہ بیروت میں 6 عمارتوں کے نیچے بنکر میں موجود تھے، حزب اللہ کے جس ہیڈکوارٹر پر حملہ کیا گیا وہ رہائشی عمارتوں کے نیچے تھا۔
جنوبی لبنان پر اسرائیلی حملوں میں 11 طبی عملے کے ارکان بھی شہید ہوئے، رپورٹس کے مطابق شہری دفاع کے مراکز اور ایک طبی کلینک پر اسرائیلی فوج نے حملے کیے تھے، جن میں ڈاکٹر، نرسیں اور طبی عملے کے ارکان شہید، اور 10 زخمی ہوئے۔ یہ حملے اسرائیلی سرحد کے قریب لبنان میں طیبہ اور دیرسریانی پر کیے گئے، لبنان پر اسرائیلی حملوں میں پیر سے اب تک شہید افراد کی تعداد 700 سے زائد ہو گئی ہے۔
عرب میڈیا کی رپورٹ کے مطابق اسرائیل نے بیروت میں 10 فضائی حملے کیے تھے جس کے نتیجے میں 6 بڑی عمارتیں ملبے کا ڈھیر بن گئیں۔
