بیروت میں حزب اللہ کے سربراہ حسن نصر اللہ کو نشانہ بنانے کے فوراً بعد ہی یہ بات سامنے آ گئی تھی کہ اسرائیل نے اس حملے میں امریکی ساختہ بم استعمال کیا ہے، تاہم بم کی نوعیت سے متعلق تفصیلات اب سامنے آئی ہیں۔
اتوار کے روز ایک امریکی سینیٹر مارک کیلی نے پہلی بار اعتراف کیا کہ اسرائیل نے جمعہ کو بیروت میں حزب اللہ کے رہنما سید حسن نصر اللہ کو نشانہ بنانے کے لیے جو بم استعمال کیا وہ امریکی ساختہ گائیڈڈ بم تھا۔
مارک کیلی کے مطابق اسرائیل نے حسن نصر اللہ کو مارنے کے لیے مارک 84 بم استعمال کیا، جس کا وزن 2000 پونڈ یا 900 کلو گرام ہے، اس بم میں JDAMs (جوائنٹ ڈائریکٹ اٹیک میونیشنز) کا استعمال کیا گیا ہے، یہ گائیڈڈ گولہ بارود ہے جو ایک غیر گائیڈڈ بم کو گائیڈڈ ہتھیار میں تبدیل کر دیتا ہے، اور اس مقصد کے لیے یہ پنکھوں اور GPS گائیڈنس سسٹم کا استعمال کرتا ہے۔
حملے میں استعمال ہونے والے ہتھیار کے بارے میں یہ پہلا امریکی بیان ہے، پینٹاگون نے ابھی تک مارک کیلی کے بیانات پر کوئی تبصرہ نہیں کیا ہے، جب کہ اسرائیلی فوج نے حملے میں استعمال ہونے والے ہتھیاروں کو ظاہر کرنے سے انکار کر دیا تھا۔ تاہم آئی ڈی ایف کا کہنا تھا کہ انھوں نے اس حملے میں چند منٹوں کے دوران 80 سے زیادہ بم گرائے تھے۔
مارک 84 اور ڈیزی کٹر بم
مارک 84 بم کو BLU-117 بھی کہا جاتا ہے، اور یہ مارک 80 سیریز کا سب سے بڑا بم ہے۔ مارک 80 بم ویتنام جنگ کے دوران امریکا نے استعمال کرنا شروع کیے تھے، یہ امریکا کا سب سے بھاری غیر گائیڈڈ ہتھیار تھا، اور اس وقت اس کا وزن 15,000 پونڈ تھا، اور اس کا نام تھا ڈیزی کٹر (BLU-82)۔ اس سیریز کے ایک اور ہتھیار کا نام تھا ’ڈیمولیشن بم‘ جو M118 کہلاتا تھا۔
مارک چوراسی ایک سادہ دھاتی خول ہے، جس میں 945 پونڈ (429 کلوگرام) ٹرائٹونل ہائی ایکسپلوزیو بھرا ہوتا ہے۔ یہ بم 50 فٹ (15 میٹر) چوڑا اور 36 فٹ (11 میٹر) گہرا گڑھا بنا سکتا ہے۔ اور 15 انچ (38 سینٹی میٹر) تک دھات یا 11 فٹ (3.4 میٹر) تک کنکریٹ میں گھس سکتا ہے، اور یہ اس اونچائی پر منحصر ہے جس سے اسے گرایا جاتا ہے، اور یہ 400 گز (370 میٹر) کے دائرے میں ہر چیز کو ٹکڑے ٹکڑے کر دیتا ہے۔
